Le të harrojmë për pak periudhën e fushatës, pasi edhe vete kreu i Partisë Demokratike ka rrëfyer një moment të ëmbël dashurie që e risjell për ju.
Ai është treguar gjithmonë i rezervuar kur vjen puna tek familja apo bashkëshortja, por në takimin elektoral të radhës në njësinë numër 9 në Tiranë, Lulzim Basha ka treguar përpara njerëzve se pikërisht aty është njohur me dashurinë e jetës së tij, gruan Aurela Basha.
“I njoh këto rrugët, nga futeshim e nga dilnim sepse shtëpinë e ka këtu poshtë. Kam kohë pa ardhur por nuk i kam harruar megjithatë këto kthesa nuk kanë ndryshuar. Njeriu nuk i harron kurrë vitet e fëmijërisë megjithëse kjo lagje më ka falur dashurinë e jetës sime dhe nënën e dy vajzave të mia”, u shpreh ai sipas Express.
Kryetari i Partisë Demokratike, ka ndarë gjithashtu disa detaje nga jeta e tij prej të riu çapkën i cili asokohe, mezi priste të mbaronte çdo detyrim për të takuar përsëri të dashurën e tij, Aurelën.
“Kam edhe kujtime të tjera, kur bënim ushtrimet e matematikës në shtëpinë e profesor Koçit dhe zysh Meritës. Në kat të tretë apo të katërt? I treti, po. Dhe nga kati 3 shihnin atë shtëpinë me portokalle përpara. Më pas dilja anash me kujdes dhe shkoja tek shtëpia e Aurelës”, përfundoi Basha rrëfimin nostalgjik.
