Ajo është e njohur për performancat energjike dhe të veçanta në skenë. Por një nga idetë e saj më të çmendura të Ronela Hajatit nuk është realizuar në skenë, pasi u pengua nga vetë babai i saj, i cili sot nuk jeton.
Bëhet fjalë për një ide të çmendur që pati këngëtarja: të dilte në skenë në një arkivol. E ftuar në “INterview” me Kelvi Kadillin, Ronela Hajati tregoi se thuajse e kishte gjetur arkivolin për të performuar këngën “Harroje” kur Ardit Gjebrea i tha se nuk mund të dilte në skenë me një arkivol.
“Ka qenë një këngë që e kam patur me shumë përgjegjësi, sepse do të konkurroja tek “Kënga Magjike”. Unë aty në fakt kam dashur të dilja me një arkivol, madje edhe klipi prezantues është bërë në varrezat e Tufinës, dhe i kam futur çunat në gropë për të xhiruar.”, kujtoi Ronela.
“Në fillim Arditi e priti si ide, pastaj pas shumë vitesh mora vesh që babai im kishte ndërhyrë tek Arditi dhe i kishte thënë të mos më linte, sepse nuk i dihej ç’mund të ndodhte. Arditi nuk më tha gjë, e kam marrë vesh shumë më vonë. Unë ndërkohë po kërkoja një arkivol me qira”, shkruan Anabel.al.
Në foto, babai i Ronelës Marash Hajati dhe çifti Gjebrea
Ronela tregoi edhe një situatë shumë qesharake me burrin e agjencisë funerale, i cili kur i kishte kërkuar t’i jepte një arkivol me qira, kishte mbetur i shtangur.
“Kur i thashë atij zotërisë së agjencisë funerale: “Dua një arkivol”, u pataks. “E dua për veten”, i thashë, do të ta kthej prapë.” Më tha: “Çfarë merret këtu, nuk kthehet më.” I thashë se unë do t’ia ktheja.”
“Arditi nuk më la, dhe unë në moment të fundit u thashë çunave: “Unë o dal si e vdekur, o s’dal fare.” Shkuam të gjenim një shufër tek këta që tregtojnë materiale ndërtimi, pa i thënë asgjë askujt, askush s’e dinte ç’do të bëja në skenë. U vara aty dhe dola.”
Performanca e saj tek “Kënga Magjike” 2010:
