Princi William ka folur hapur për vdekjen e nënës së tij në intervistën më të sinqertë ndonjëherë, ndërsa pozon në një foto në shtëpi, me familjen e tij.
Në imazhin e realizuar në shtëpi me qenin e tyre Lupo, Duka dhe Dukesha e Kembrixhit dhe fëmijët e tyre, George dhe Charlotte, tregojnë për revistën GQ se janë një familje perfekte.
Princi William hapet për jetën familjare, sesi dëshironte që nëna e tij e ndjerë të mund të kishte takuar Kate dhe fëmijët dhe sesi i është dashur 20 vjet të pranonte vdekjen e saj.
Ai thotë se pikëllimi i tij është i ndryshëm nga njerëzit e tjerë, sepse “të gjithë e njohin historinë”. William shton se dëshironte që Princeshë Diana, e cila u vra në një aksident tragjik në vitin 1997, kur ai ishte 15 vjeç, të ishte rrotull për të parë fëmijët e tij të rriteshin.
Biseda e sinqertë vjen pasi, vëllai i tij, Princi Harry bëri një intervistë të ngjashme duke pranuar se ai ra në “kaos total”, pas vdekjes së nënës së tij.
“Nuk mund ta bëja punën pa stabilitetin e familjes. Stabiliteti në shtëpi është kaq i rëndësishëm për mua. Dua t’i sjell fëmijët e mi në një botë të lumtur, të qëndrueshme dhe të sigurt dhe kjo është kaq e rëndësishme për të dy ne si prindër. Dua që George të rritet në një mjedis të vërtetë, nuk dua që ai të rritet prapa mureve të pallatit, ai duhet të jetë atje jashtë”, thotë në intervistë William.
Duke folur për shkatërrimin që pësoi pas vdekjes së nënës, princi u shpreh se ndodhet në vendin më të mirë që ka qenë ndonjëherë, por ju deshën 20 vite për të arritur atje.
“Më ka marrë pothuajse 20 vjet që të shkoj në atë fazë. Ende e kam të vështirë tani, sepse në atë kohë ishte kaq e papërpunuar. Dhe gjithashtu nuk është si pikëllimi i shumicës së njerëzve, sepse të gjithë e njohin historinë, të gjithë e njohin atë. Do të doja të kisha këshillën e saj. Do ta doja që ajo të takonte Catherine dhe të shikonte fëmijët të rriteshin. Më bën kaq të trishtuar që ajo nuk mund ta bëjë këtë, që ata kurrë nuk do ta njohin atë”, shprehet në një intervistë të rrallë.
Muajin e kaluar Princi William pranoi se ai ende emocionohej, ndërsa fliste për dhimbjen pas vdekjes së nënës, gjatë fushatës për çështjet e shëndetit mendor.
“Kam arsyetimet e mia për t’u përfshirë në shëndetin mendor – çfarë ndodhi me mua dhe nënën kur isha më i ri. Unë jam pa fjalë në të vërtetë. Jam mjaft i emocionuar. Kështu që do iki të qetësoj pak veten. Njerëzit mendojnë se tronditja nuk mund të zgjasë aq gjatë, por ndodh. Është një moment kaq i rëndësishëm në jetën tuaj dhe nuk ikën kurrë, thjesht mësoheni me të”.
Burimi: Daily Mail
