Dëshiron të bësh pushime në Amerikë? Apo të vizitosh ndonjë të afërm? Tashmë nuk ke nevojë për garanci në mënyrë që të marrësh viziën turistike për të vizituar SHBA-të.
Ambasada e SHBA-ve në Tiranë dha dje lajmin e mirë përmes faqes në “Facebook”, ku njoftoi se tani nuk u duhet më garancia për intervistën në ambasadë, por vetëm pasaporta dhe fleta e konfirmimit.
Ndërsa më parë ishte e detyrueshme garancia e një të afërmi që jeton në SHBA, tashmë nuk është fare e nevojshme.
“Po planifikoni pushimet në SHBA? Po aplikoni për vizë? Ju nuk keni nevojë të paraqitni një garanci në intervistën tuaj për vizë turistike! Pasaporta juaj dhe fleta e konfirmimit të formularit DS160 janë gjithçka na nevojitet në intervistën tuaj. Kini parasysh që vendimet nuk bazohen tek dokumentet; bazuar në intervistën tuaj, oficeri konsullor do të vendosë nëse ju kualifikoheni për vizën. Si zakonisht, do t’u përgjigjem me kënaqësi pyetjeve tuaja mbi vizat sot dhe gjatë javës!”, shkruhet në postimin në “Facebook” të Ambasadës së SHBA-ve në Tiranë.
