“Kam gjithçka kam dashur në jetë”. Kështu e shprehu dje këngëtari Sinan Hoxha dashurinë për të birin dhe bashkëshorten Andrra Destani.
Dita e djeshme ishte shumë e rëndësishme për çiftin pasi festonin 1-vjetorin e ardhjes në jetë të djalit Ansi.
Dhe ndaj e meritonte të ishte e tillë, duke i organizuar një festë me të afërm, miq dhe artistë të njohur të skenës shqiptare.
Në këtë ditë të veçantë, Andrra ndau një prej momenteve më domethënëse gjatë shtatzënisë, përmes një postimi në “Instagram”.
Ajo zbuloi se për herë të parë e ndjeu Ansin në barkun e saj, kur ai dëgjoi zërin e babait gjatë një koncerti në Gjermani. Sapo Sinan Hoxha mori mikrofonin për të kënduar, Ansi dha goditjen e parë në barkun e nënës, datë të cilën e ka shënuar përgjithmonë në memorie.
“Lajmi i ardhjes tënde në jetë ishte vula me vlerë të panumërt e dashurisë që na mbështillte mua dhe babanë tënd. Ndonëse rrugëtimi i njohjes dhe kurorëzimit tonë ishte i mbushur me emocione të pakufishme e thellësisht të ndiera, asgjë s’ishte e barasvlershme me lajmin që na mbushi jetën në mënyrë të papërshkrueshme. Teksa ti frymoje brenda meje, përpiqesha të të imagjinoja në tërësinë tënde e thurja ëndrra të pafundme për ty. Mëngjesi më zgjonte me mendime për ty e nata mbyllej me dorën mbi barkun që brenda kishte mrekullinë time. Ditët i linin radhën njëra-tjetrës, barku rritej e unë çdo ditë e më shumë të ndieja në pafundësinë time.
Babai yt erdhi në Gjermani për të mbajtur koncertin e radhës së bashku me kolegët e tij. Përgjatë të gjithë koncertit, ndonëse tingujt ishin të fortë, dukej sikur kjo situatë s’të shqetësonte aspak e ti njësoj si çdo ditë flije në barkun tim. Ama, sapo ai preku skenën e mori mikrofonin për të kënduar vargjet e para, ti në atë çast më dhe gjurmën tënde të parë, GODITJEN TËNDE TË PARË!
E shoh të kotë të vazhdoj të shkruaj për Mrekullinë e 8të tonën. Ti je fryt i dashurisë sonë dhe Diell i pashtershëm që çdo ditë e më shumë rrezaton jetët tona. 25.05.2016: kjo është data që shënoi jetën time e të babit tënd.
Ahhhh sa shumë ndiej e sa pak mund të shkruhet për ty…Ti je jetë që jetës sime i jep jetë. Nuk ka lumturi më të madhe e më të prekshme teksa shoh që unë dhe babi yt, jemi përfshirë tek Ty. Trekëndëshi Sinan-Andrra-Ansi ishte gjithçka që unë kisha ëndërruar një jetë.”
