Dizajnuesja e njohur italiane, Laura Biagiotti, është ndarë nga jeta pas një arrestit kardiak. Lajmi trishtues është bërë sot i ditur nga mediat italiane.
Dizajnuesja u shtrua mbrëmjen e së mërkurës në spital me urgjencë, ndërsa mjekët verifikuan që dëmtimet kishin të bënin me vdekjen e trurit.
Mjekët kanë bërë të ditur se arresti kardiak është regjistruar në shtëpinë e dizajnueses. Por falë manovrave reanimatore gjatë rrugës për në spital dhe me të mbërritur atje, zemra ka rinisur punën, por mosfurnizimi i trurit me gjak ka shkaktuar dëmtime të këtij të fundit.
Biagiotti ka lindur më 4 gusht 1943 në Itali. E pagëzuar nga “New York Times” si mbretëresha e kashmirit, ajo është ndër të paktat stiliste femra që e shpërndau modën “Made in Italia” në të gjitha tregjet botërore.
Ajo e nisi karrierën në mes të viteve ’60, duke ndjekur gjurmët e nënës së saj, Delia Soldaini Biagiotti, themeluese në atë kohë e një shtëpie mode. Shumë shpejt ajo nisi të bashkëpunonte me emrat e mëdhenj të modës italiane si Roberto Capucci apo Rocco Barocco.
Që prej vitit 1980, Laura Biagiotti jetonte dhe punonte në fshatin e saj roman, Guidonia, në kështjellën Marco Simone, e ndërtuar në shekullin XI.
Bashkëshorti i saj, Gianni Cigna, ka ndërruar jetë në vitin 1996. Ndërsa e bija, Lavinia, është bërë pjesë e biznesit të saj të modës në vitin 1997 dhe që prej vitit 2005 është zëvendëspresidente.
