Erand Hoxha… Mbajeni mend mirë këtë emër sepse do ta hasni shumë shpesh. Ai u rikthye fuqishëm këtë fillim viti në fokusin e mediave të huaja dhe shqiptare, si një ndër tre aktorët shqiptarë që morën pjesë në filmin aksion “Fast & Furious 8”. Por aktori 30-vjeçar nuk dëshiron të përmendet vetëm për rolin e tij në këtë film të njohur të Hollivudit, i cili zgjati për të vetëm pak minuta, por i dha shumë famë.
Në fakt Erandi e ka nisur karrierën në aktrim katër vite më parë, krejt rastësisht, kur një miku i tij italian i kërkoi ndihmë për t’i gjetur disa makina për filmin e ri. Erandi, që deri në atë kohë kishte punuar si jurist në zyrën e të atit, u shtang nga kjo ofertë por pranoi dhe sot jeton në Gjermani ku po ndjek karrierën.
Miku italian, që ka qenë shtysa më e madhe e tij për t’u futur në aktrim, me sa duket u tërhoq nga tiparet mesdhetare dhe karakteri i fortë i një shqiptari si Erandi, i cili përfundoi duke luajtur rolin negativ të një tregtari droge, rol që Erandi thotë se i përshtatet dhe e ndjen veten më mirë.
Sot Erandi ka arritur të depërtojë në kinematografinë botërore falë vullnetit dhe punës së tij ndërsa ka fituar edhe eksperiencë në fushën e regjisurës. Aktori tregon për portalin “Iconstyle.al” se ka një sërë projektesh kinematografike të huaja dhe shqiptare. Filmi i radhës, “Elvis Walks Home” pritet të dalë në tetor, por prapa nuk mbeten dhe projektet e tij në Shqipëri. I pyetur nga “Iconstyle.al” se cila ka qenë sakrifica më e madhe që Erandi ka bërë për hir të një roli, ai flet për herën kur i është dashur të dhunojë një femër në rol.
Raporti me to duket tepër special, veçanërisht në fotot që 30-vjeçari publikon në rrjetet sociale, ku e shohim gjithmonë nën shoqërinë e femrave të ndryshme. Erandi thotë se ende nuk ka dalë një femër që t’i rrëmbejë fjalëkalimin e zemrës, por një gjë e thotë me siguri, ajo do të jetë shqiptare, dhe kjo s’ka asnjë dyshim.
Intervista e plotë e Erand Hoxhës për “Iconstyle.al”:
1.Cili është projekti jot i radhës? Ku do ta shohim Erandin së shpejti?
Projekti im i radhës është filmi “Elvis Walks Home” një film bashkëpunim anglo-shqiptar me regji të Fatmir Kocit & Jonathan Preece. Filmi ka luftë, dramë. Pritet të dalë në kinema në tetor të këtij viti. Kam dhe dy projekte të tjera por që janë në xhirime e sipër dhe s’më lejon produksioni të flas për to.
2.Keni thënë që aktualisht jeni i fokusuar në karrierën tuaj jashtë Shqipërie? Po ndonjë projekt në Shqipëri a keni?
Karriera ime faktikisht ka qenë e fokusuar këtej për arsye të aplikimeve të mia në filma të huaj. Por këtë verë në gusht, jam pjesë e një seriali shqiptar dhe një filmi shqiptar, për të cilët akoma nuk kam shumë informacion për të folur.
3.Nga roli si tregtar droge, te roli i një detektivi, apo i një rebeli me forcat ruse. Cili rol është më i dashur për ty?
Rolet negative besoj, sepse u përshtatem më shumë dhe e ndjej veten mirë.
4.Po roli më i vështirë që ke luajtur?
Roli i vështirë s’di për kë të them sepse më janë dhënë ato role që unë i bëj shumë mirë, e ndjej veten mirë dhe vështirësi nuk kam ndjerë ndonjëherë përveçse në rolin e një detektivi ku duhej mbajtur një seriozitet i tepruar për mua.
5.Sakrifica më e madhe që ke bërë për hir të një roli?
Ka qenë pjesa ku duhet të dhunoj e të godas një femër, domethënë gruan time në film, gjë që s’më ka pëlqyer ndonjëherë, por kam qenë i detyruar ta bëj për hir të rolit.
6.Çfarë këshille ke për ata aktorë e regjisorë që nuk kanë mundësi të zhvillojnë karrierën jashtë Shqipërisë?
Të krijojnë kontaktet me jashtë sepse në internet mund t’i krijosh pa ndihmën e askujt, ashtu siç arrita unë këtu ku jam, mund të arrijë kushdo, mjafton të aplikosh në projektet e huaja që shpallen online. Ju sugjeroj të gjithëve të përdorin sa më shumë internetin, sepse bota sot në internet po ecën, në internet po punojnë.
7.A mjafton një skenar i mirë për të bërë një film të mirë? Sa rëndësi ka buxheti në prodhimin e një filmi?
Nuk mjafton vetëm skenari sepse buxheti është ai që bën skenarin për mendimin tim. Buxheti është kryesori sepse në bazë të buxhetit ndryshon dhe skenari.
8.Cila është ajo gjë që ti mendon se do ta përmirësonte industrinë e filmit në Shqipëri?
Të rihapet kinostudio dhe shteti të japë fonde si dikur për filmat shqiptarë.
9.Një titull filmi të huaj që mendon se është vlerësuar më tepër seç duhet…
Nuk besoj se vlerësimet janë më shumë nga ç’duhet, pasi të vlerësosh një film, në një festival filmi ku ka juri dhe juria përbëhet nga shumë persona, s’besoj të ketë vlerësime të tepruara apo të gabuara.
10.Si është jetesa në Gjermani? E keni pasur të vështirë të përshtateni atje?
Jeta në Gjermani është e mirë, shtet social mbi të gjitha dhe ka atë qetësinë, rregullin që kam dashur gjithmonë.
11.Sa rëndësi i kushton pamjes fizike dhe markave origjinale?
Pamjes fizike i kushtoj vëmendje aq sa më lejon etika e një mashkulli, pa e kaluar atë ndërsa për rrobat më pëlqen të ketë prerjen time, të më rrijë mirë të jetë e bukur,e stilit tim, nuk ka rëndësi marka për mua.
12.Cila është pika jote më e dobët dhe më e fortë?
Pike ime e dobët është miqësia dhe besimi i pakufizuar që jap, kurse pika ime e fortë është durimi.
13.Do të lidheshit me një fansen tuaj?
Varet…
14.Më mirë një të dashur shqiptare apo një gjermane? Nga ndryshojnë?
Gjermane …jooo asnjëherë. Ne femrat shqiptare i kemi mashalla.
15.Aktualisht jeni në një lidhje?
Për momentin jo, akoma s’ma ka gjetur ndonjëra “password”-n e zemrës…(qesh)
Burimi: Iconstyle.al
