Të gjithë kishim besim te fuqia e vokalit të Lindita Halimit, për performancën e saj në edicionin e 62-të të “Eurovision”-it. Dhe Halimi, si përfaqësuese e Shqipërisë nuk na zhgënjeu në këtë aspekt.
Perfrormanca e saj elektrizoi skenën e festivalit prestigjioz të mbajtur në Kiev, mbrëmjen e së martës.
Halimi doli në skenë e katërta prej artistëve që prezantojnë këngët e tyre në natën e parë gjysmëfinale.
Ajo arriti që të niste dhe të përfundonte me sukses performancën e këngës, pavarësisht vështirësisë së saj. Për më tepër, vetë faqja zyrtare e “Eurovision”-it në “Facebook” bëri një koment shumë pozitiv, menjëherë pasi këngëtarja shqiptare përfundoi performimin.
Duke shkëputur pjesën më të vështirë, në “Eurovision” shkroi: “Uau Lindita! Kjo është ajo që ne e quajmë një notë të lartë të gjatë!”.
Për të qenë realist vokali i saj ishte fantastik! Por atëherë pse u eliminua Shqipëria nga “Eurovision”-i që natën e parë të festivalit?
Disa komentues, të huaj dhe shqiptarë, kanë shkruar mendimin e tyre për arsyen e eliminimit duke kritikuar këngën. Kënga nuk ishte e përshtatshme dhe e një stili të vjetër, prej të cilit ne e kemi të vështirë të heqim dorë kur prezantohemi në festivale me kaq rëndësi.
“Shqipëri, ti ke këngë pop të mrekullueshme. Lëreni “Festivalin e Këngës” dhe mos dërgoni diçka të dalë mode, por moderne dhe surprizojni njerëzit. Nuk e dija që këngët shqiptare ishin perfekte, për shkak të këngëve tuaja të “Eurovision”-it. Por zbulova disa këngë cilësore shqiptare”, shkruan një komentues nga Turqia.
Ndërsa një komentuese shqiptare shkruan: “Linda ka një zë të fuqishëm. Për të qenë realist kënga nuk ishte e përshtatshme për “Eurovision”, pavarësisht vokalit të saj fantastik”.
“Shqipëria duhet të bëjë një këngë të gëzuar, nëse do një vend të mirë në “Eurovision”, shkruan dikush tjetër.
“Gjithmonë duke bërë të njëjtin gabim. Kur do ta kuptoj Shqipëria që këngët e dalë mode nuk funksionojnë më, duket të jetë një këngë e lezetshme e thjeshtë, kjo është ajo që pëlqejnë njerëzit ditët e sotme”, është komenti i dikujt tjetër.
Lindita performoi këngën “Botë” (“World”) me muzikë të Klodian Qafokut dhe tekst të Gerald Xhari.
Disa përdorues të internetit shkruan edhe për paraqitjen e Linditës.
“Shqipëria kishte fustanin e nuses më fantashkencor që kam parë” apo “Djali më pyeti pse Elsa po këndon në televizion”.
Festivali i RTSH-së prej vitesh ka nxjerrë fitues këngë të cilat i përkasin “modës” së vjetër dhe që janë kritikuar ashpër edhe nga dëgjuesit shqiptarë.
Burimi: ICONstyle.al
