Sot në Ditën e Evropës, ish-Ministria e Integrimit, Majlinda Bregu, ndau me miqtë e saj një status të gjatë ku, ndër të tjerat, tregon edhe ngjashmëritë tona me ato të popullit evropiane. Ata që shëtisin të lirë, vitet e fundit, do t’i mbështesin menjëherë, sepse vërtetë që, përveç një rafinimi që do të na i sjellë koha, në tryezë po bëhemi njësoj.
“Ne marrim frymë në Europë. Ne hamë dhe pimë Europë. Kafe, kapuçino, pizza, tzaziqi, verë, pasta, patatina, nutella. Ne punojmë për Europën, fason, krom, bakër, mollë, tartuf, luleshtrydhe edhe kanabis po të doni.
Ne ecim me Europë, këpucë, Fiat, Mercedes, Wolswagen, Citroen, Parket, pllaka; vishemi me Europë, flemë në Europë, dëgjojmë Europë, Moxart, Celentano, Verdi, Pavarotti, Beatles, 3 tenorët; ne lexojmë Europë Niçe, Dante, Frojdi; shohim Europë,lozim futboll në Europë, kërcejmë vals, passo dueble, martohemi, vdesim me fustane e shtrat të fundëm nga Europa.
Ne kemi jetuar dhe luftuar në Europë, jemi magjepsur nga Monaliza, Vajza me Vëth Perle, dhe rrëqethur nga Holokausti, dalim foto kudo në ura, monumente, statuja, lulishte në Europë.
Ne ishim refugjatë në Europë, trafikantë në Europë, familjarë të ndershëm në Europë, studentë të shkëlqyer e biznesmenë të ndershëm. Ne bëjmë politikë me europiane, qofshin këta ambasadorë, kolegë apo negociatorë.
Çfarëdo të jetë, azil ose art, arkitekturë, letërsi, udhëtim, peizazh, pikturë, muzikë, futboll, veshje, biznes, drejtësi a luftë, Europa është fati ynë i paracaktuar. Është ëndrra, shpresa, ideali i civilizimit. Është siguria që i përkasim dhe pa të nuk bëjmë dot”, shkruan, ndër të tjera, deputetja e Partisë Demokratike, Majlinda Bregu.
