Të gjithëve ndodh që na ka mbetur në mendje një veshje që e kemi parë te dikush tjetër. Nuk kishte si të mos tërhiqte vëmendjen fustani i kuq dhe i florinjtë i Tarik Ediz, i veshur nga linjat e modeles Xhesika Berberi.
Fustani i dizajnuesit turk, i cili ka një çmim prej 1.120 dollarësh, është pëlqyer aq shumë nga disa prej personazheve shqiptare, sa na kanë dhënë mundësinë ta shohim në silueta të ndryshme. Fustani është i mbuluar me gurë të kuq të pjesën e sipërme dhe me detaje të florinjtë, ndërsa më pas vjen në stil të lirshëm tyli ngjyrë të kuqe.
Personazhi i parë që e mbajti veshur ishte Xhesika Berberi, e cila duket se bashkëpunoi me markën dhe dyqanin online që nxirrte në shitje fustanin.
Duket se Xhesika e paraqiti në mënyrën perfekte këtë fustan duke qëlluar në “zemrën” moderatores Alketa Vejsiu. Kjo e fundit u shfaq me fustanin në një ndër netët e sezonit të parë të spektaklit “Dance With Me”.
Pak kohë më pas, një nga fytyrat më të dashura të televizionit, Valbona Selimllari, i dha një hijeshi krejt të ndryshme, duke e kombinuar me një kurorë të madhe në kokë.
Ish-Miss-i shqiptar, e cila konsiderohet edhe pas shumë kohësh si një nga femrat më të bukura shqiptare, shfaqet me këtë pamje në disa foto profesionale.
Më pas, një tjetër emër i botës së Miss-eve, Fjoralba Dizdari, ka zgjedhur të njëjtin fustan, për paraqitjen e saj në dorëzimin e kurorës për kolegen e ardhshme.
Prej tyre ne e kemi të vështirë të zgjedhim se “Kujt i qëndron më bukur?”, por këtë mund të na e thoni ju përmes komenteve më poshtë.
Burimi: ICONstyle.al
