Ajo e nisi karrierën e modelingut në Shqipëri, duke rënë në sy të fotografit Sonny K. Elson, për tiparet e veçanta që ka. Por sot, Arselajda Buraku është cilësuar si një ndër modelet e momentit nga revista prestigjioze, ” W “.
Në një intervistë për revistën, Arselajda tregon se nuk ka qenë gjithmonë e lirë në Shqipëri, të udhëtojë në Milano apo Paris si modelet e tjera dhe njerëzit nuk e kanë kuptuar në vendin e saj.
Modelja shqiptare Arselajda Buraku hapet për emigrimin dhe gjetjen e lirisë nëpërmjet vetëshprehisë. Sipas saj, modelimi është një mënyrë e përsosur për ta bërë këtë.
“Sapo pata mundësinë për t’u pajisur me numrin e sigurimeve shoqërore dhe lejen për të punuar, iu drejtova agjensisë sime dhe i tregova ato çfarë kisha në mendje. U thashë që doja të shprehja veten dhe mënyrën sesi ndihem për trupin tim, flokët e mia. Doja ta ndaj historinë time nëpërmjet shkrepjeve që realizoj. Sepse çdo shkrepje për mua është një moment i së kaluarës, një moment i së tashmes dhe një shpresë për të ardhmen”.
Më herët, në një intervistë për ” Paper “, ajo u shpreh se ka ardhur nga Shqipëria në NYC me një valixhe dhe ky udhëtim do t’i shërbejë për të ndjekur ëndrrën amerikane.
