Fundjavat në Tiranë i përkisnin atij. Nuk ka të rinj e të reja që të mos kenë shkuar të paktën njëherë të dëgjojnë live Vedat Ademin. Këngëtari nga Kosova që bëri himne duke kënduar gjatë fundjavës, këngët shqip si “Koha s’kthehet”, apo “Një jetë me ty”, sot u mungon orëve të vona të kryeqytetit.
Ai ka zgjedhur Shtetet e Bashkuara për të ndjekur “ëndrrën amerikane”. I pyetur nga “ICONstyle” për arsyet e largimit, ashtu si shumë artistë të tjerë, Vedat Ademi thotë se Shqipëria nuk e ka favorizuar. Falë punës së palodhshme me muzikën dhe sakrificave, ai ka arritur suksesin dhe për këtë falënderon familjen dhe fansat për mbështetjen.
Megjithatë, Vedat Ademi premton rikthimin në Shqipëri dhe Kosovë dhe në muajt e verës do ta kemi sërish pranë. Gjatë kësaj periudhe këngëtari do të risjellë hitet e tij më të fundit, mes të cilave “Më mirë me zemër”, një bashkëpunim me Vullnet Ibrahimin dhe “Let me love”, një këngë ritmike e rrymës “Reggae”, perfekte për verën, që pritet të dalë në pak javë.
Pavarësisht projekteve, Vedati thotë se gjen kohë edhe për familjen. Ai tregon marrëdhënien e veçantë me djalin Jon Art dhe dëshirën për një fëmijë të dytë që pritet të kompletojë familjen Ademi.
Intervista me këngëtarin Vedat Ademi:
Prej 7 muajsh u keni munguar fansave në Shqipëri. Përse zgjodhët të largoheshit në Shtetet e Bashkuara dhe a do të jetë një shpërngulje përfundimtare?
Fansave në Shqipëri ju kam munguar, por ndërkohe kam qenë në Toronto dhe New York pranë fansave të tjerë. Sigurisht kam sjellë edhe këngë të reja për të qenë prezent në tregun muzikor.
E patët të lehtë që të përshtateshit me New York-un, njerëzit dhe ambientin atje?
Edhe vite më parë të përshtatesha në Tiranë, duke qenë se vija nga Kosova nuk e kisha të thjeshtë, kështu edhe përshtatja me një vend të ri jashtë Shqipërisë kërkon kohën e vet. Gjithsesi kam patur mundësinë të kem miq të mirë dhe që më qëndrojne pranë.
Ju, aktori Gent Bejko dhe mjaft artistë të tjerë jeni pjesë e “grupit” të shqiptarëve që kanë “braktisur” Shqipërinë për një jetë më të mirë. Mendoni se Shqipëria nuk i favorizon apo mbështet sa duhet artistët?
Për secilin është zgjedhje personale dhe nuk i di arsyet e të gjithë artistëve. Muzikën time e kam krijuar falë punës time të palodhshme dhe sakrifikuese, nuk mendoj që më favorizon Shqipëria, më ka favorizuar talenti dhe puna ime këmbëngulëse. Nuk kam pasur mbështetjen e askujt përveç familjes dhe më tej fansave të cilët më kanë përzgjedhur falë shijes muzikore.
Do të vazhdoni të merreni me muzikën dhe koncertet në SHBA, apo keni gjetur diçka të re, ndoshta një punë apo eksperiencë të re?
Vazhdoj të merrem me muzikë dhe koncertet do të jenë kudo, jam gjithmonë në lëvizje, sipas koncerteve përshtatem edhe me vendodhjen.
Pas koncertit në ” Ditën e Verës “, si ju duk rikthimi në Tiranë? Ku do t’ju shohim këto muajt e verës?
” Dita e Verës ” ishte vërtet Verë dhe kënaqësia ishte e madhe për t’u çmallur me fansat të cilët mund të vinin në koncertin e hapur. Muajt e verës do të jem në lëvizje Shqipëri- Kosovë etj.
Kënga e fundit që keni publikuar është “Më mirë me zemër” në bashkëpunim me Vullnet Ibrahimin. Po punoni për ndonjë projekt të ri muzikor?
“Më mirë me zemër”është kënga e fundit e publikur dhe ky bashkëpunim kishte kohë që kishte nisur, ishte thjesht realizimi me klip që mori kohën e vet. Sigurisht kam plane për këngë të reja. Pres realizimin e klipit që të mund ta publikoj së shpejti, një këngë ritmike verore e realizuar në Florida.
Ju dhe Dorela keni më shumë se 8 vjet të martuar dhe jeni bekuar me një djalë të bukur që quhet Jon Art. Do ta donte Vedati një gocë të bukur?
Jemi të bekuar vërtet, djali ynë rritet dhe na gëzon me shkollën dhe përshtatjen në anglisht për shkak të ndryshimit. Ne duam fëmijë, nuk e kemi të përcaktuar vajzë a djalë, sikurse nuk e kishim në herën e parë. Të gjithë e dinë sa i dua unë fëmijët dhe sa mirë përshtatem me ta. Çdo gjë në kohën e vet.
Si është Vedati si baba për Jonin e vogël? A je shumë i lidhur me të dhe a i kushton kohë sa duhet?
Jon Art për mua është kënaqesi. E marr dhe e dërgoj në shkollë, dal me të në lokale, luaj me të në shtëpi dhe park, dëgjojmë muzikë ose shohim filma. Që i vogël ka qenë shumë fëmijë i mbarë dhe ka qenë me ne jashtë shtëpisë, rrugëve në makinë etj, kudo që kemi lëvizur pa u ndjerë dhe tepër i qetë.
Burimi: ICONstyle.al
