Mbretëreshës së Anglisë iu kërkua një qenush, si dhuratë nga një djalosh 9 vjeç. Vogëlushi, që jetonte në një provincë të Mantovës, në fillim të këtij muaji mori guximin që nëpërmjet një letre t’i kërkonte Mbretëreshës Elizabeth një qen “Corgi”.
Dihet që Mbretëresha është e dashuruar pas qenve të saj dhe ka shumë të tillë, prandaj vogëlushi e ka parë të arsyeshme t’i kërkonte një.
Në letrën e tij ai ka bërë edhe një vizatim të bukur, ku gjithashtu shkruante:
“E dashur Mbretëreshë, ju keni shumë qenushë “Corgi” dhe dini ku t’i gjeni. A mund të kem edhe unë një? Gjithsesi ti je Mbretëresha dhe bëj si të duash ti”.
Nuk ka kaluar shumë dhe vogëlushi ka marrë një përgjigje nga Oborri Mbretëror duke e vënë në dijeni se, Elizabeth e ka lexuar letrën dhe e ka pëlqyer shumë vizatimin e tij. Fatkeqësisht dëshira e tij nuk mund të realizohet dhe megjithatë ai është i lumtur, që Mbretëreshës i ka pëlqyer vizatimi me ngjyra.
