Gjatë 24 orëve të fundit, 9 raste të reja të infektuarish me koronavirus janë shënuar në Shqipëri, duke çuar në total numrin e të prekurve në 782.
Mësohet se nga rastet e reja, 5 janë në Tiranë dhe 4 në Krujë.
Ka pësuar një ulje të ndjeshme numri i personave të hospitalizuar. Aktualisht në dy spitalet COVID, te Urgjenca e Infektivit dhe “Shefqet Ndroqi” janë të shtruar 33 pacientë, 3 më pak se dje, nga të cilat 7 janë në terapi intensive në gjendje më të rëndë.
Që nga fillimi i epidemisë deri më sot janë konfirmuar pozitivë me COVID-19 në të gjithë vendin 782 qytetarë, prej të cilëve 488 janë të shëruar, ndërsa 263 janë pacientët aktivë me COVID-19. Pjesa më e madhe prej tyre po ndiqen nga mjeku i familjes ose janë asimptomatikë.
Situata me koronavirusin në mbarë botën:
Drejtori i OBSH-së në Evropë ka paralajmëruar që vendet duhet të përgatiten për një valë të dytë ose të tretë të koronavirusit derisa të zhvillohet një vaksinë.
Dr. Hans Kluge paralajmëroi që COVID-19 nuk do të largohet shpejt dhe tha se shëndeti publik do të duhet të “ketë një vend më të spikatur në shoqëri”.
Turqia ka regjistruar 2.615 raste të reja me virus, duke e çuar shfirën e përgjithshme të të diagnostikuarve në mbi 120.000. 4.846 njerëz janë shëruar plotësisht, ndërsa numri i të vdekurve nga koronavirusi në Turqi është ngjitur në 3.174, pasi vendi regjistroi 93 vdekje të tjera në 24 orët e fundit.
Rusia regjistroi një numër rekord të rasteve me koronavirus për ditën e tretë me radhë, pasi 7.933 më shumë njerëz rezultuan pozitivë për virusin. Dje rezultoi pozitiv edhe kryeministri i vendit, Mikhail Mishustin i cili ka thënë këtë të enjte se është diagnostikuar me koronavirus dhe përkohësisht është larguar nga detyra e tij për t’u rikuperuar.
Numri i të vdekurve nga COVID-19 në Britani është rritur në 26.711, ndërsa numri i rasteve të zbuluara është rritur me 6.033, për të shkuar në 171,253. Kryeministri britanik Boris Johnson theksoi dje se gjatë ditës janë kryer 81.611 testime, ndërsa numri i përgjithshëm i testeve të kryera në vend arrin në 901.905.
Kryeministri Australian Scott Morrison, i cili ka zemëruar Pekinin duke bërë thirrje për një hetim global mbi shpërthimin e koronavirusit, tha se ai nuk kishte prova që të sugjeronin se virusi e ka origjinën në një laborator në qytetin kinez të Wuhan.
Numri i rasteve të konfirmuara me koronavirus në Gjermani u rrit me 1.639 në 160.758, treguan të dhënat nga Instituti Robert Koch (RKI) për sëmundje infektive.
Numri i vdekjeve u rrit me 193 në 6.481. Autoritetet gjermane kanë rënë dakord të rihapin kishat dhe institucionet kulturore si muzetë dhe kopshtin zoologjik, si pjesë e lirimit gradual të bllokimit nga pandemia në vend.
Ekonomia e zonës së euros u tkurr me 3.8% në tremujorin e parë, goditja më e madhe që nga viti 1995. Në të gjithë botën, numri i infeksioneve të konfirmuara ka arritur në më shumë se 3.25 milionë, me rreth 232,000 vdekje dhe më shumë se një milion shërime.
/Iconstyle.al
