Gjatë muajve maj dhe qershor janë larguar 87 mijë persona nga puna si pasojë e pandemisë.
Lajmi aspak pozitiv është dhënë nga vetë ministrja e Financave dhe Ekonomisë, Anila Denaj gjatë një një takimi bilateral me Ministrin e Punëve dhe Çështjeve Sociale të Kosovës, Skënder Raçica.
Sipas Denajt, 119 mijë biznese ishin aktive deri në fund të korrikut, ndërsa fasoneritë dhe kryesisht ata që janë në prodhim, janë sektorët më të goditur nga pandemia e COVID-19. Ministrja foli me optimizëm kur tha gjithashtu se në gusht pati 3 mijë më shumë të punësuar se para pandemisë, por kur këtë e lidhi me premtimet elektorale për sigurimin e mandatit të tretë, hezituam ta besojmë!
“Ne vijmë pas dy goditjesh tërmeti dhe pandemia dhe është miratuar skema e punësimit duke subvencionuar. Taksa progresive mbi pagat ka lehtësuar barrën, ku 80% e qytetarëve kanë përfituar. Edhe në mandatin e tretë do t’i qëndrojmë fort taksës progresive . Në gusht 3 mijë më shumë të punësuar se para pandemisë. Në statistika nuk duket se numri i bizneseve është ulur”, tha Denaj.
Por në fakt sipas një studimi të Monitor.al, 73% e humbjeve të vendeve të punës kanë ardhur nga subjektet e vogla, të cilat janë ndër më të prekurat nga kriza ekonomike pas mbylljes nga COVID-19, dhe askush nuk po bën asgjë për këtë sektor. Mbi 32,4 mijë biznese në vend janë mbyllur dhe 98% e tyre janë subjekte të vogla.
Por a do të kishte kaq shumë humbje të vendeve të punës nëse do të ishin mbështetur bizneset që u detyruan të falimentonin?
Korriku nxori në pah pasojat reale nga izolimi gati tremujor i këtyre bizneseve dhe faktin që paketat mbështetëse të qeverisë, nuk kanë mjaftuar që mijëra biznese të mbijetojnë në treg.
Mjafton të marrim sektorin e bareve, lokaleve dhe restoranteve në vend që janë në kushte mbijetese nga pandemia, për të parë se askush nuk po bën asgjë për t’ua lehtësuar sado pak vështirësitë e tyre financiare, përkundrazi.
Pjesa më e madhe e restoranteve në vend të cilat kanë marrë ambientin me qira, po hasin mjaft probleme në sigurimin e të ardhurave mjaftueshëm sa për të paguar qiranë, punonjësit apo të bëjnë furnizimin. Shteti gjithashtu nuk ka bërë asnjë hap, për reduktimin e TVSH-së, shtyrjen e taksave, dhënien e kredive të buta, apo minimumi mbulimin e këtyre qirave, por vijon me gjobat selektive të lokaleve të dasmave, si për të thënë se po zbatohet akti normativ.
Turizmi ndër më të goditurit
Turizmi është gjithashtu një ndër më të goditurit nga mungesa e turistëve për shkak të masave të marra nga shumë shtete për ndalimin e udhëtimeve.
Roli i qeverisë për ta ringritur turizmin ishte i nevojshëm, por mungoi në çdo drejtim. Kreu i Shoqatës së Turoperatorëve dhe Agjencive Turistike, z. Rexhep Kasmi tha ditë më parë për “iconstyle.al”, se shteti nuk i stimuloi shqiptarët që të pushonin në vendin e tyre ashtu siç bënë shumë shtete fqinje (lexo këtu), pavarësisht propozimit të turoperatorëve.
“Ndonjë stimulim nga shteti nuk u bë. Ne e kemi propozuar atë bonusin sidomos për familjet me të ardhura të caktuara. Mund të caktohej që t’u jepej mundësi në këto kushte, duke qenë të prekur nga pandemia, tu jepej mundësia të bënin të paktën një javë pushime. Prandaj janë këto stimulimet. Por këtu nuk u pa e arsyeshme. Normalisht ishte një stimul, por u la më tepër në dorë të spontanitet ‘të vijë kush të vijë’. Ishte një mundësi për t’u siguruar për turistët”, u shpreh ai.
E vetmja ide për të ringritur turizmin, që nuk na çoi gjëkundi, ishte ajo e ministrit Blendi Klosi për zgjatjen e sezonit turistik deri më 15 nëntor apo ajo e dhënë nga ish-ministri i Shëndetësisë, Ilir Beqja, i cili kërkoi më shumë pushime për administratën gjatë javës, dhe propozoi që në muajt e verës, e premtja dhe e hëna të jenë pushim.
/Iconstyle.al
