Studentët e Tiranës e kanë të vështirë që çdo muaj të sigurojnë abonenë me 600 lekë, ndaj detyrohen që të paguajnë sa të gjithë qytetarët që përdorin transportin publik 1600 lekë.
Sipas tyre, për të përfituar një abone studenti duhet të kesh mik ose duhet t’i drejtohesh tregut të zi në rrugë informale.
“ Abonenë këtu e marrin vetëm personat që kanë miq. Shikoj në autobus njerëz tek të 40-at që kanë abone ndërsa unë si student rri me abonenë e përgjithshme”.
“ Asnjëherë nuk e kemi marrë abonenë e studentit, blejmë abone të përgjithshme si gjithë të tjerët.Nuk është në treg, vetëm në tregun e zi.Mund ta marrësh nëse ke ndonjë mik apo njohje”.
Në një raport të Qëndresës Qytetare bëhet me dije se 80% e studentëve nuk përfitojnë abone për shkak të numrit të limituar që del në treg.
“13904 abone prodhohen çdo muaj për studentët e Tiranës. Kjo shifër plotëson vetëm 20% të numrit total të studentëve që kryejnë studimet në Tiranë”.
Po ashtu bashkia nuk ka një procedurë ligjore për pajisjen e studentëve me abone. Në të tilla kushte operatorët i shpërndajnë ato nën dorë.
/Ora News
