Të përfytyroj. Je ulur në kolltuk me celular në dorë dhe je zhytur në morinë e njoftimeve për shtëpi me qira që qarkullojnë online. Të ka dalë shkolla në Tiranë, ke vendosur të largohesh nga shtëpia e familjes për të fituar pak pavarësi, ti dhe partneri/ja keni vendosur më në fund të nisni bashkëjetesën…
Ka shumë arsye që mund të të çojnë dhe ty t’i bashkohesh qindra të tjerëve që janë në kërkim të një shtëpie me qira në kryeqytet, ndaj nëse ke nisur gjuetinë tashmë, ja disa gjëra që duhet t’i dish mirë para se të hedhësh hapin e madh.
1. Gjërat nuk janë siç duken në foto
Gjatë kërkimit për shtëpinë perfekte, do të ruash aq shumë njoftime me foto të bukura sa nuk do dish cilën të zgjedhësh më parë. Epo gjeje pak… Gjërat nuk janë aspak ashtu siç duken në foto. Agjenci të shumta imobliliare përdorin shpesh një foto “standarte” (po e zbukurojmë) edhe për shtëpi që nuk kanë aspak lidhje në realitet me imazhin që ti ke parë. Dhe ti e gjen veten papritur duke udhëtuar deri në Arushë për të parë një apartament që as që i afrohet asaj për të cilën ishe nisur. Në raste të tjera, fotot tregojnë vetëm atë që qiradhënësi do që ti të shohësh, pra në foto mund të mos jetë domosdoshmërisht dollapi mikroskopik, apo fakti që nga dritarja sheh thjesht një mur. Beso dhe kontrollo!
2. Kërko informacion sa më shumë që të mundesh
Gjatë kërkimeve online e veçanërisht në gazetat print, do të hasni pafund njoftime për shtëpi që jepen me qira që nga përshkrimi, duken ekzaktësisht si ajo që po kërkoni. Realiteti është që në shumë raste, togfjalëshi “arredim modern” i referohet thjesht mobilimit të fillimviteve 2000. Në të tilla raste, përpara se të lësh një takim me të zotin e shtëpisë apo agjentin imobiliar, mundohu të bësh një bisedë me të në telefon dhe ta pyesësh me imtësi për gjërat që të interesojnë dhe kur njoftimi nuk ka foto, kërkoju atyre që privatisht të të dërgojnë disa imazhe, në mënyrë që të dyja palët të kursejnë një takim që mund të rezultojë në humbje kohe.
3. Qendra dhe lagjet periferike kanë shuuumë diferencë
Si në gjithë botën, edhe në Tiranë nuk do shumë mend për t’u kuptuar se qiratë në zonën pranë qendrës së qytetit janë shumë më të larta se ato disi më periferike (hiq këtu lagjet rezidenciale). Por kur vjen puna tek cilësia, gjërat ndryshojnë. Në qendër, një apartament me mobilim të kohës së diktaturës me një madhësi minimale, mund të ketë një qira prej 300 eurosh në muaj, ndërkohë që të njëjtin çmim ka edhe një apartament mirëfilli modern dhe me hapsirë të bollshme në lagje disi më periferike si Unaza e Re apo Fresku. Këtu hyjnë në punë prioritetet!
4. Llogarit transportin
Nëse je në kërkim të një shtëpie me qira, me shumë gjasa je në shkollë ose në punë, çka do të thotë se duhet të tregohesh i/e kujdeshëm/me në lidhje me vendndodhjen e shtëpisë tënde të ardhshme. E ke punën në Bllok, por nuk ia lejon dot vetes një shtëpi me qira aty pranë për shkak të çmimeve? Atëherë syno një lagje pak më larg për të kursyer në qira dhe përdor transportin publik. Urren transportin publik? Atëherë bëj kompromis me veten dhe kurseji paratë në drejtime të tjera, për të përballuar një qira disi më të kripur. Ke makinë personale dhe nuk ta ndjen për karburant? Vëri gishtin hartës së Tiranës dhe zgjidh! Për ty paska qenë kjo jetë…
5. Sigurohu që qiradhënësi i ka shlyer detyrimet
Përpara se të firmosësh kontratën e qiramarrjes, sigurohu që nuk po hyn në një shtëpi me borxhe. Në shumë raste, qiradhënësit nuk kanë shlyer detyrimet që u takojnë si faturat e prapambetura të energjisë elektrike apo të ujësjellësit dhe një ditë të bukur, mund të gjeni veten pa drita e pa ujë.
6. Në rast dëmi… çfarë ndodh?
Si në çdo shtëpi, edhe në shtëpinë tuaj të re, është e sigurt se një ditë diçka do prishet dhe jo domosdoshmërisht për fajin tuaj. Por kush paguan? Përgjithësisht në këto raste, shpenzimet për riparimin i mban qiradhënësi, megjithatë, për të mos pasur mosmarrëveshje në të ardhmen, kjo është diçka për të cilën diskutohet që përpara se të hyni në shtëpi.
7. Po, qiraja të ha vërtetë!
Nuk ke jetuar kurrë në Shqipëri nëse nuk ke dëgjuar shprehjen “Qiraja të ha!”. Prindërit dhe gjyshërit tanë kanë jetuar deri diku të qetë në lidhje me këtë aspekt, pasi në periudhën e komunizmit, shtëpia përgjithësisht të sigurohej nga shteti. Kjo është dhe arsyeja përse kur t’i i thua gjyshes që do marrësh një shtëpi me qira, ajo të sheh sikur sapo ke thënë një blasfemi. Por për diçka kanë të drejtë: Qiraja vërtet të ha! Nëse ti dhe personi që ndoshta do të ndash qiranë punoni dhe keni të ardhura mesatare, gjasat janë që do të përballeni shumë shpejt me një krizë ekonomike në shtëpinë tuaj të re. Qiraja dhe faturat e tjera (energjia elektrike, uji, interneti) do të marrin një pjesë të mirë të të ardhurave tuaja dhe ndonëse shtëpia mund të jetë e mobiluar, do ta gjeni veten përditë duke blerë diçka të re që e kuptoni vetëm rrugës që ju mungon dhe të gjitha këto janë shpenzime të paparashikuara. Ndaj gjëja më e mirë për t’u bërë në këto raste është që të kurseni disa para përpara se të hyni në shtëpinë e re, në mënyrë që në fund të muajit mos t’ju dalin flutura nga portofoli.
8. Jo, ti nuk mund të ikësh një ditë të bukur pa lajmëruar
Nëse një ditë ti vendos që shtëpia që ke marrë me qira nuk bën për ty dhe vendos të ikësh, mendohu mirë. Ashtu sikurse në marrëdhëniet e punës, ti nuk mund të ikësh ekzaktësisht sot për nesër, pasi kjo përkthehet në dëm ekonomik nga ana e palës tjetër. Ashtu siç qiradhënësi nuk mund të të nxjerrë nga shtëpia kur vendos ai (në këtë rast të mbron kontrata), edhe ti duhet të lajmërosh disa ditë paraprakisht që ke vendosur ta lësh shtëpinë. Në të kundërt, qiradhënësi ka të drejtë të të mbajë paratë e garanciosë (qiranë shtesë) që me siguri ke paguar që ditën e parë që je futur në shtëpi.
Burimi: Iconstyle
Kujdes! Ndalohet kopjimi dhe riprodhimi pa lejen e redaksisë!
