Pavarësisht se çdo gjë duket se është e shkruar në skenar, ndjenjat e njerëzve janë të pakontrollueshme dhe të paparashikuara. Ndaj zënkat apo skandalet që ndodhin live në spektakël apo emisione, të cilat nxiten nga sjelljet e njerëzve, shpesh nuk mund të shmangen. Spektaklet shqiptare kanë treguar prej vitesh se mund të bëhen burim lajmesh kryesore, duke fituar vëmendjen e medias dhe publikut vetëm nga skandalet. “Iconstyle.al” vendosi që të rikthejë në kujtesën e të gjithëve përplasjet më të njohura mes personazheve të famshme:
Almeda Abazi
Pas përfundimit të DWTS, Almeda Abazi ka shpërthyer në kritika ndaj produksionit pak minuta para se të largohej drejt Turqisë. Sipas moderatores, ajo ka paguar çdo shpenzim shtesë në hotelin ku ka qëndruar për më shumë se tre muaj në Tiranë, për të qenë pjesë e spektaklit. “Sapo bëra check-out nga hoteli ku qëndrova për 3 muaj në Tiranë dhe për habinë timë pagova shpenzimet extra, pra ujin që kam pirë në minibar dhe laundry që kam larë rrobat, madje edhe hekurosjen e kostumit të Tolgës, i cili pa asnjë lloj interesi erdhi me shumë dëshirë dhe respektoi në maksimum stafin dhe produksionin e DWTSA duke lënë angazhimet e tij në Turqi”-është shprehur Almeda Abazi.
Lori Hoxha
Lori Hoxha u shpall fituese e DWTS në edicionin e tij të katër. Mirëpo pak kohë më pas, Lori Hoxha deklaroi se nuk e mori kurrë çmimin e madh të spektaklit, që ishte një apartament. Debati mes Lori Hoxhës dhe Holta Dulakut, nga rrjetet sociale përfundoi në dyert e gjykatave.“Marrëveshja me producenten e DWTS është bërë në një tavolinë, dhe ashtu duhet të kishte mbaruar. Meqenëse zonja producente zgjodhi mënyrën më të shëmtuar, unë këtë nuk e bëj dot, por ja kam lënë në dorë avokatëve të familjes pasi shpifja dhe prishja e imazhit nuk janë të pranueshme me ligj, ” është shprehur Lori Hoxha për të zgjidhur konfliktin me Holta Dulakun.
Altuna Sejdiu
Altuna Sejdiu (Tuna) është fituesja e edicionit të pestë të spektaklit “Dancing With The Stars”, e cila deklaroi se media se nuk e kishte marë apartamentin e premtuar. Madje theksoi se produksioni e kishte kërcënuar. Mirëpo producentja Holta Dulaku është shprehur se Sejdiu ka marë apartamentin të konvertuar në vlerë monetare, e për këtë zotëronte edhe dokumenta që e vërtetonin. Sakaq, Dulaku tha se do i drejtohet rrugëve gjyqësore për shpifjet se produksioni ka kërcënuar Altunën.
Linda Rej
Linda Rej u largua nga spektakli “Dance with me”, pasi shfaqi pakënaqësi nga ana e produksionit. Sipas Lindës, stafi nuk mbulonte asnjë shpenzim shtesë. “Nuk kërkova gjëra luksi por thjesht zonja Vera nuk ha çdo ditë për gati 4 muaj, tre gjëra dhe normalisht nuk jam ndjerë aspak mirë sepse unë në 5 javë në Shqipëri kam harhuar 2500 euro nga vetja për të jetuar ashtu siç jam mësuar unë. Sakrificën si në kohën e komunizmit lidhur me ushqimin dhe jetesën nuk kisha pse ta përjetoja unë!” – është shprehur Linda Rej.
Fjolla Morina
Më 9 nëntor të 2016, në mediat rozë u publikua lajmi se Vera Grabocka kishte kapur për flokësh, konkurenten e spektaklit “Dance With Me”, Fjolla Morinën. Megjithëse, pati disa versione për këtë ngjarje. Të pranishmit u shprehën se ato debatuan për një arsye jo madhore, por nuk pati përleshje fizike. Disa të tjerë, thanë se Vera dhunoi fizikisht Fjollën. Megjithatë, Fjolla Morina qëndroi në garë deri në përfundim të spektaklit .
Elhaida Dani
Elhaida Dani u shpall fituese e Festivalit të fundvitit në 2014. Mirëpo sipas drejtueses së “Anabel.al” Dalina Buzi, ishte vendosur para finales se Dani do të përfaqësonte Shqipërinë në Eurovizion. Ajo ndër të tjera shkruante: “Nëse ti nis të krijosh diçka me energji të keqe, nëse rrugës për të arritur diku, ti lëndon apo përjashton pa të drejtë bashkëpunëtorë, atëherë Zoti apo Universi (quajeni si të doni) nuk është me ty.” Mirëpo Elhaida vendosi ta injorojë këtë deklaratë: “Dalina Buzin? Nuk e njoh.”
Big Brother -“Love Edition”
Edicioni i fundit i BBA i quajtur ndryshe “Love Edition”, u përfshi nga polemika të shumta pasi shumë nga konkurentët e njihnin njëri-tjetrin. Damiano dhe Fjorentina, zbuluan se ata njiheshin përpara se të konkuronin në shtëpinë e “Big Brother”. Madje Damiano Agalliu, u ndëshkua nga organizatorët për shkelje të rregullave.
Burimi: Iconstyle.al
