Personazhet e famshme janë gjithmonë në qendër të vëmendjes dhe çdo detaj nga jeta e tyre ngjall interes tek publiku, sidomos kur bëhet fjalë për lidhjet e tyre të dashurisë. Një përqafim, një puthje e dhënë në publik apo edhe një deklaratë dashurie e tyre shndërrohet menjëherë në lajm.
Mirëpo ndryshe nga disa çifte të cilët nuk e kanë problem të ndajnë me fansat e tyre momente nga lidhjet e tyre të dashurisë, disa të tjerë janë aq diskretë saqë të gjithë harrojmë se janë bashkë.
Një ndër çiftet që janë treguar diskret që në momentet e para të lidhjes së tyre janë Klea Huta dhe Elgit Doda. Prej një kohe të gjatë ata u përfolën se ishin në një lidhje së bashku, të cilën as e pohonin dhe as e mohonin. Ndërkohë që të gjitha mediat zienin për çiftin më të ri të showbiz-it shqiptar, dyshja e njohur u dorëzua dhe e konfirmuan në mënyrën më të bukur romancën e tyre.
Klea publikoi në Instagram një foto ku po merrte një puthje në ballë nga Elgiti.
Mirëpo ndryshe nga gjithë çiftet e tjerë, të cilët në çdo event shkojnë bashkë, apo publikojnë vazhdimisht foto së bashku në rrjetet sociale dhe dedikime për çdo festë të mundshme, Klea dhe Elgiti në këtë rast janë shumë ndryshe. Ata janë tepër të fshehtë dhe në rrjetet sociale mundohen të publikojnë vetëm foto apo video, të cilat kanë lidhje me anën e tyre profesionale.
Ndërsa përsa i përket faktit që Elgiti nuk e shoqëron Klean në eventet e ndryshme që organizohen në kryeqytet, këngëtarja është justifikuar duke thënë se ai është tepër i zënë me projektet e tij të reja dhe i duhet të punoj me orë të tëra në studio prandaj nuk e shoqëron dot.
Këngëtarja Çiljeta Xhilaga dhe Alban Hoxha prej kohësh po përfliten se janë bashkë në një lidhje dashurie, të cilën as e kanë mohuar dhe as e kanë pohuar. Fillimisht mundoheshin të mos shfaqeshin së bashku në asnjë event publik, por kohët e fundit duket sikur kanë ndryshuar pak.
Në rrjetet e tyre sociale nuk kanë asnjë foto të përbashkët, ndërsa në rastet e rëndësishme të lidhjes së tyre ata publikojnë foto apo dedikime jo të drejtpërdrejta, por që na bëjnë të mendojmë se në mënyrë indirekte ia dedikojnë njëri-tjetrit.
Mirëpo ndërkohë që gjatë muajit mars u përfol se Çiljeta dhe Albani janë ndarë si pasojë e tradhtisë nga ky i fundit, këngëtarja duket se nuk duroi më dhe për herë të parë publikoi një video ku shfaqej në makinë së bashku me portierin e “Partizanit”. Pikërisht kjo video është cilësuar edhe si konfirmimi i parë publik i lidhjes së dyshes së njohur.
Pavarësisht kësaj ata ende vazhdojnë ta mbajnë shumë të fshehtë lidhjen e tyre, duke mos zbuluar asnjë detaj për syrin kureshtar të publikut.
Bojken Lako dhe Semi Jaupaj janë dy artistë të talentuar shqiptarë, të cilët janë në një lidhje dashurie që prej vitit 2011-të. Menjëherë pasi u nda nga ish-gruaja, Olesia, Bojkeni nisi një lidhje të re dashurie me këngëtaren Semi Jaupaj, e cila është 17 vite më e vogël se ai.
Dashuria për muzikën dhe veçanërisht për rokun i lidhi bashkë dy artistët dhe prej 7 vitesh kanë një histori dashurie të qëndrueshme, të cilën janë përpjekur ta mbajnë jashtë vëmendjes mediatike.
Ata publikojnë shumë rrallë foto së bashku në rrjetet sociale dhe tregohen të kujdesshëm për të mos ndarë me publikun detaje nga lidhja e tyre, aq sa jo të pakta janë rastet që kemi pyetur nëse janë apo jo akoma së bashku.
Moderatorja Luana Vjollca dhe biznesmeni nga Kosova, Krenar Çoçaj janë dy personazhe të tjerë të njohur të showbiz-it shqiptar, të cilët janë përfolur vazhdimisht se janë në një lidhje dashurie. Asnjëri prej tyre as e ka pohuar dhe as e ka mohuar romancën e tyre, pavarësisht se vazhdimisht janë kapur së bashku nga papracët.
E pyetur në intervista të ndryshme në lidhje me historinë e saj të dashurisë me Krenarin, Luana ka preferuar të mos prononcohet duke thënë se jeta private për të është shumë e shenjtë dhe nuk do që ta bëjë publike.
Trashëgimtarja e “Top Channel” Lori Hoxha dhe i dashuri i saj Visi Bajraktari janë munduar gjithmonë ta fshehin dashurinë e tyre, ose më saktë ta shijojnë privatisht. Ata janë së bashku prej rreth 6 vitesh, megjithëse asnjëherë nuk kanë preferuar ta bëjnë publike lidhjen e tyre.
Vetëm pak kohë më parë në emisionin radiofonik “You&Me” në “ERG Radio”, Lori ka folur për herë të parë për lidhjen e saj dhe ka treguar se si nisi historia e tyre e dashurisë.
“Ne kemi bashkë 6 vjet e gjysmë. Jemi njohur në shkollë, nuk ishte dashuri me shikim të parë. U deshëm fillimisht si njerëz, pastaj si romantikë. Unë nuk bëj hapa të parë. E bëri ai. Kur shkova në shkollë për herë të parë, njerëzit mu turrën, kurse Visi më mbrojti. Më hodhi krahun si shok i mirë,”- ka thënë Lori në këtë intervistë, megjithëse në rrjetet e tyre sociale mungojnë fotot e tyre të përbashkëta.
Ronela Hajati dhe Young Zerka prej kohësh janë përfolur se janë duke përjetuar një romancë dashurie, por që në çdo moment ata e kanë mohuar një lidhje të mundshme me tyre. Mirëpo fotot e tyre të përbashkëta, etiketimet që i bëjnë njëri-tjetrit dhe komentet që ata ndajnë mes tyre na kanë bërë të gjithëve të dyshojmë se ata janë bashkë.
Mirëpo me sa duket dyshja e njohur ka vendosur ta shijojë lidhjen larg syrit të publikut dhe mbase një ditë do ta ndajnë edhe me fansat.
Dy këngëtarët e njohur, Eni Koçi dhe Genc Prelvukaj prej gati një viti po përfliten për një lidhje dashurie mes tyre. Megjithatë dyshja nuk e ka konfirmuar asnjëherë që janë të dashur duke thënë se janë vetëm miq dhe kolegë të mirë.
Mirëpo pavarësisht se ata nuk kanë preferuar të flasin publikisht për lidhjen e tyre, detaje të shumta na kanë lënë të kuptojmë se Eni dhe Genci janë më shumë se sa thjesht miq.
