Një fjalim i përgatitur nga presidenti i Shteteve të Bashkuara të Amerikës, Barack Obama për refugjatët, është frymëzuar nga një vogëlush shqiptar.
Bëhet fjalë për Aleksandër Myteberin, 6 vjeç, me origjinë nga Korça, i cili jeton prej vitesh në SHBA me familjen. Më poshtë fjalimi që është publikuar në faqen e Obamës:
Mënyra se si fëmijët i perceptojnë dhe ndiejnë gjërat, është gjithnjë për t’u marrë në konsideratë. Disa prej tyre, prindërit nuk i lejojnë të shohin apo bisedojnë rreth pamjeve që tregojnë anën tjetër të botës, vuajtjet e fëmijëve të tjerë, duke i lënë kështu të rriten e përfytyrojnë një botë ideale, që nuk ekziston.
Prindërit e Alexander Myteberit, fëmijës 6 vjeçar me origjinë nga Korça por që jetojnë prej vitesh në Amerikë, nuk kanë bërë të njëjtën gjë! Nuk e kanë penguar djalin e tyre t’a shohë botën në sy! T’i flasë! Ta përmirësojë! Kanë qenë pikërisht pamjet tronditëse të një djali 5 vjeçar në Siri, që e kanë bërë Aleksin t’i drejtohet me një letër presidentit të SHBA, Barack Obama. Sot, faqja e Ambasadës Amerikane në Shqipëri, ka shpërndarë fjalët e Obamës në fjalimin e tij, ku ka folur pikërisht për Alexin. Ja çfarë ka thënë: “Alex është vetëm 6 vjeç. Muajin e kaluar, ashtu si shumë njerëz në botë, ai u prek nga pamjet zemërthyese të Omran Daqneesh, një djalë 5 vjeçar në Aleppo, Siri, ulur në një ambulancë, i tronditur teksa fshinte gjakun nga duart e tij.
Alex u ul dhe më shkroi një letër. Këtë javë, në samitin e Kombeve të Bashkuara për refugjatët unë ndava me të gjithë botën fjalët prekëse të Alexit. Ai më tha se donte që Omrani të vinte dhe të jetonte me familjen e tij. Ai donte ti jepte biçikletën e vet dhe ta mësonte si ta ngiste atë. Ai tha se motra e tij do mblidhte flutura për të. “Ne mund të luajmë të gjithë bashkë,” shkruante ai. “Ne do të bëhemi familja e tij dhe ai do të jetë vëllai ynë.”
Këto janë fjalët e një djali 6 vjeçar – një djalë i vogël që nuk ka mësuar të jetë cinik, apo dyshues apo të ketë frikë nga njerëzit e tjerë për shkak të vendit nga ata vijnë, për shkak të pamjes së tyre apo të mënyrës se si luten.
Ne të gjithë duhet të jemi si Alexi. Përfytyroni si do të dukej bota po të ishim të tillë. Përfytyroni sa vuajtje do të kursenim dhe sa jetë do të shpëtonim. Dëgjoni Alexin teksa lexon letrën e tij dhe reflektoni se përse unë e ndava atë me të gjithë botën.”
Presidenti Barack Obama
