Dashuria ndaj atdheut është një temë delikate që jo rrallë ngjall polemika kur bëhet temë diskutimi. Çdo person e manifeston në mënyra të ndryshme dashurinë e madhe që ka ndaj atdheut, mirëpo kur kjo bëhet publikisht në sy të qindra e mijëra njerëzve këto simbole marrin akoma më shumë peshë.
Në jo pak raste kemi qenë dëshmitarë se simboli i shqiponjës dykrenare i bërë me duar nga shqiptarët kudo në botë ka ngjallur debate mes shteteve dhe në jo pak raste është kërkuar ndëshkimi i personave që e kanë bërë këtë gjest.
Rasti më i fundi është ai i dy futbollistëve shqiptarë, Granit Xhakës dhe Xherdan Shaqirit, të cilët janë pjesë e kombëtares zviceriane. Pas dy golave të tyre speklatolarë kundër kombëtares së Serbisë, dy shqiptarët festuan me simbolin e shqiponjës me duar. Një gjest ky që ngriti peshë zemrat e gjithë shqiptarëve kudo në botë.
Mirëpo nga serbët këto u quajtën si gjeste provokuese dhe politike. Madje menjëherë pak kësaj FIFA bëri me dije se Komiteti i Disiplinës ka nisur hetimet ndaj Xhakës e Shaqirit.
Një veprim tepër emocional që Shaqirit dhe Xhakës mund t’u kushtojë edhe përjashtimin nga ndeshjet e Kampionatit Botëror.
Mirëpo dy futbollistët me origjinë shqiptare nuk janë të vetmit që vihen në qendër të sulmeve pasi bënë gjestin e shqiponjës me duar. Edhe këngëtarja me origjinë shqiptare, Eleni Fouriera, e cila përfaqësoi Qipron në Eurovizion, u kryqëzua nga mediat greke pasi bëri simbolin e shqiponjës së bashku me përfaqësuesin e Shqipërisë në këtë kompeticion muzikor, Eugent Bushpepën.
Dy këngëtarët shqiptarë zgjodhën të shfaqnin mbështetjen ndaj njëri-tjetrit duke bërë simbolin e shqiponjës me duar. Pikërisht ky veprim bëri jehonë të madhe në mediat greke të cilat e cilësuan si një gjest provokues.
Televizioni grek, “Star” shkruante në faqen e tij në internet se veprimi i dy këngëtarëve tregonte “Shqipërinë e Madhe”, duke e lidhur me nacionalistët dhe UÇK-në.
“Të gjithë e dimë që ky simbol që ka bërë Eleni me këngëtarin shqiptar përfaqëson idenë që shqiptarët kanë për ‘Shqipërinë e Madhe’, por me siguri Eleni nuk është në dijeni të një fakti të tillë ndaj e ka bërë atë veprim. Më duket se Eleni me këtë simbol tregon se nuk është nga Meksika”, komentoi me ironi, njëra prej gazetareve në studion e televizioni “Star”.
I menjëhershëm ishte edhe reagimi i Elenit pas këtyre sulmeve ndaj saj.
“Muzika është për të bashkuar dhe jo ndarë njerëz, e prandaj jam këtu pa asnjë lidhje me gjithë këto çështje nacionaliste që disa njerëz më akuzojnë mua. Me të vërtetë e dua Greqinë dhe askush e asgjë nuk mund ta ndryshojë këtë. Le të shkojmë tani e të përfaqësojmë Qipron në mënyrën më të mirë”, shkruante Eleni në postimin e saj në Instastory.
Në muajin shkurt u bëmë dëshmitarë të një rasti tjetër ku 7 ushtarë shqiptarë pjesë e ushtrisë së shtetit grek u dënuan me 60 ditë burg pasi u fotografuan duke bërë me duar simbolin e shqiponjës. Ky ka qenë edhe dënimi maksimal që ka dhënë ndonjëherë shtabi i përgjithshëm i ushtrisë greke.
“Vendimi i shefi të shtabit iu përcoll ministrit të mbrojtjes, Panos Kammenos, që vendosi t’i shtojë dënimet në maksimumin e lejueshëm të kompetencave të tij”, thuhej në komunikatën e shtabit të përgjithshëm të forcave të armatosura greke.
Madje në vitin 2016 ka ndodhur një situatë tjetër e ngjashme me rastin e mësipërm, ku disa ushtarë të ushtirsë zviceriane u fotografuan duke bërë simbolin e shqiponjës me duar. Ata ishin të gjithë ushtarë zvicerianë, por me origjinë kosovare e zotërues të dy pasaportave.
Fotoja e tyre u publikua ne website-n zyrtar të medias zvicerane “Mattinaonline” dhe u shoqërua me një sërë komentesh negative, por ndaj tyre nuk u morën masa disiplinore ndëshkuese.
Edhe në prill të viti 2015 u publikuan një foto ku disa ushtarë pozojnë të veshur me uniformën zviceriane, por në dorë mbajnë flamurin e Shqipërisë. Ky fakt ka kërkuar asokohe prononcimin publik të zëdhënësit të ushtrisë zvicerane Christoph Brunner i cili është shprehur se “kur ushtarët zviceranë janë me uniformën, duhet të shohim vetëm flamurin e Zvicrës”.
Ngjarja më e bujshme që ka ndodhur në lidhje me simbolet kombëtare shqiptare dhe që do të mbahet mend ndër vite është futja në mes të stadiumit të Serbisë e dronit me flamurin e “Shqipërisë së Madhe”, teksa po luhej ndeshja Serbi-Shqipëri, për “Euro 2016”.
Futja e dronit në mes të stadiumit të Beogradit shkaktoi ndërprerjen e ndeshjes dhe u shoqërua me një sërë incidentesh dhe përleshjesh mes futbollistëve shqiptarë dhe tifozëve serbë.
Pas këtij incidenti Komisioni Disiplinor i UEFA-s nisi edhe një procedim ndaj këtij gjesti dhe gjithë zhvillimeve të tjera që ndodhën gjatë kësaj ndeshje, e cila u detyrua të ndërpritej.
Pikat e vendimit të UEFA-s
1-Ndeshja Serbi- Shqipëri regjistrohet zyrtarisht me rezultat 3-0 për Serbinë.
2-Federatës së Futbollit të Serbisë, përkatësisht reprezentacionit “A”, u merren tri pikë në kualifikimet për Evropianin 2016, kampionat i cili pritet të mbahet në Francë.
3-Federata e Futbollit Serb dënohet me dy ndeshje si vendas pa tifoz.
4-Federata e Futbollit Serb dënohet me 100 mijë euro
5-Federata e Futbollit Shqiptar dënohet me 100 mijë euro.
Jashtë vëmendjes nga kjo ngjarje nuk ngeli edhe autori i ngritjes së dronit të famshëm “Autochtonos”, Ismail Morina i njohur nga të gjithë me emrin Ballist Morina. Shteti serb shpalli kërkesën për arrestimin e Ismail Morinës.
*Kujdes! Ndalohet riprodhimi i këtij materiali pa lejen e redaksisë së Iconstyle.al