Pa kaluar as një muaj që nga hapja e shkollave, është mbyllur gjimnazi i parë në vend për shkak të përhapjes së virusit Covid. Gjimnazi “Sami Frashëri” në Përmet ka mbyllur dyert për nxënësit pasi 6 mësues kanë rezultuar pozitiv me Covid-19.
Burime për FaxNews bëjnë me dije se fillimisht ka dalë pozitive një mësuese e gjimnazit dhe më pas u janë bërë tamponët personave me të cilët ajo shoqërohej në ambientet e shkollës.
Në përgjigjet e testeve kanë dalë pozitivë edhe 5 mësues të tjerë, ndërkohë që nuk është kryer tampon për asnjë nga nxënësit të cilët mund të kenë pasur kontakt me to.
Sipas informacioneve fatmirësisht nuk ka asnjë fëmijë me simptoma të Covid-19, por ajo që dihet gjerësisht është se fëmijët mund të jenë asimptomatikë, ndaj të rrezikuar mbeten familjarët e tyre në shtëpi, prindër edhe gjyshërit që janë grupmosha më e prekur nga virusi.
Asnjë zë nga Ministria e Shëndetësisë dhe ajo e Arsimit
Covid-19 ka pushtuar thuajse çdo institucion, por rastet e përhapjes së virusit nëpër shkolla janë rritur shumë dhe janë shpërndarë andembanë vendit. Vazhdimisht janë raportuar raste të infektuarish në shkolla, edhe pse deri më tani nuk ka asnjë reagim nga Ministria e Arsimit, të cilës duket se po i rrëshqet situata nga kotrolli, pas vendimi të nxituar për të hapur shkollat.
Mbetet për t’u parë se cila do të jetë strategjia e radhës e ministrisë së Arsimit dhe asaj të Shëndetësisë në lidhje me shkollat dhe universitetet, hapja e cilave po rezulton mjaft me rrezik për përhapjen e virusit.
Gjithsej në Përmet janë 16 raste pozitive dhe 2 vdekje prej Covid. Kurse në të gjithë vendin gjithsej janë 13259 raste pozitive që nga fillimi i pandemisë dhe 377 humbje jete përkatësisht (Qarku Tiranë 179, Durrës 46, Shkodër 40, Elbasan 26, Fier 20, Korçë 19, Lezhë 16, Kukës 10, Dibër 8, Vlorë 7, Gjirokastër 4, Berat 2).
/Iconstyle.al
