Këngëtarja Shkurte Fejza ka dhënë një lajm të bukur për mbështetësit e muzikës së saj.
Ajo ka njoftuar se do të mbajë dy koncerte, një në Kosovë dhe tjetrën në Shqipëri për nder të 50 vjetorit të saj në skenë. Më anë të një postimi në Facebook, ajo ka thënë që më datën 8 Qershor do ta mbajë koncertin në Pallatin e Sporteve në Prishtinë ndërsa më 29 Qershor në Pallatin e Kongreseve në Tiranë.
Fejza falënderon bashkëpunëtoret e saj, miqtë, familjen si dhe adhuruesit e këngëve të saj.
“Me zemër plot mirënjohje, dua të falënderoj secilin prej jush – bashkëpunëtorët e mi të çmuar, miqtë, familjen, dhe veçanërisht ju, adhuruesit e këngës sime, për mbështetjen dhe dashurinë që më keni dhuruar gjatë këtyre 50 viteve karrierë. Si artiste, misioni im ka qenë gjithmonë të bashkoj zemrat e bashkatdhetarëve të mi përmes muzikës, duke promovuar vlerat kombëtare dhe rrëfimin e vuajtjeve dhe sfidave të popullit tonë në rrugën drejt pavarësisë dhe lirisë. Jam munduar qe muzika ime te jete zëri i shpresës, guximit dhe përkushtimit të pathyeshëm të njerëzve tanë në kërkim të një të ardhme më të mirë. Çdo fjalë që kam kënduar reflekton luftën, dashurinë dhe ëndrrat e popullit tim. Faleminderit që më keni dhënë fuqinë dhe inspirimin për të vazhduar këtë rrugëtim. Bashkë kemi ndarë lot e gëzime”, shkruan këngëtarja.
