Përgjigjet e shumëpritura të Lotarisë Amerikane janë publikuar ditën e djeshme dhe siç shihet qartë në rrjetet sociale, kudo ka shpërthyer dëshpërimi. Dikush mallkon fatin e tij të zi e dikush u shfryhet prindërve, përse nuk e kanë lindur në Korçë. Por ç’ti bësh? Jeta vazhdon, ndaj në vend që të vijoni të qaheni për ëndrrën tuaj amerikane të thyer, “Iconstyle.al” ju sugjeron disa gjëra më të vlefshme për të bërë.
1.Ndërro punë.
Nëse jeni vërtetë kaq të dëshpëruar për faktin që nuk mund të emigroni në SHBA, me shumë gjasa puna juaj nuk ju bën aspak të lumtur. Ndaj në vend që të vijoni të zhyteni në vorbullën e dëshpërimit, lëreni atë punë që ju ka ardhur në majë të hundës. Do thoni: “Fjalë goje!”. Por e vërteta është se kjo është një sakrificë që ia vlen të bëhet, parë në aspektin afatgjatë. Mendoni punën që keni dashur gjithnjë të bëni dhe përkushtohuni arritjes së këtij qëllimi. Nëse nuk e keni ende të qartë, se çfarë doni të bëni në jetë, eksploroni fusha të reja. Ka aq shumë profesione që ju me siguri nuk i keni dëgjuar kurrë dhe një prej tyre mund të jetë perfekt për ju.
2.Zhvillo pasionet e tua.
Të pasurit një hobi është shpëtim për këdo, që mendon se jeta e tij është shndërruar në diçka monotone. Investo në sportin ose aktivitetin që ke dëshirë të zhvillosh dhe mundohu ta bësh atë në mënyrë të rregullt, pa nxjerrë justifikime si mungesa e kohës apo lodhja.
3.Shqyrto një alternativë tjetër.
Opsioni i Amerikës u dogj edhe këtë vit? Epo punë e madhe! Bota ka vende plot. Nëse jeni vërtet të vendosur të largoheni nga Shqipëria, sepse “ky vend nuk bëhet”, atëherë ndoshta duhet të nisni të shihni për një tjetër alternativë emigrimi. Pyesni të afërmit dhe miqtë tuaj që jetojnë jashtë Shqipërisë dhe analizoni se, cili vend i aksesueshëm do të ishte më i përshtatshëm për ju. Pasi të jeni të qartë me veten tuaj, shqyrtoni mënyrat sesi mund të shkoni atje, qoftë edhe me punë sezonale të ofruara nga kompani të shumta, që operojnë edhe në vendin tonë, sepse fati mund t’ju buzëqeshë atëherë kur nuk e prisni.
4.Përkushtohu më shumë tek familja.
Nuk janë të paktë personat që janë kthyer nga emigracioni vetëm se, nuk kanë përballuar dot largësinë nga familja. Nëse tani nuk ju bën përshtypje një gjë e tillë, me siguri në momentin që do të ishit larg do ta ndienit. Ndaj mundohuni të krijoni më shumë afrimitet me prindërit, motrat e vëllezërit, si dhe të zgjidhni konfliktet që mund t’ju shtyjnë larg tyre. Në momentin që gjërat do të jenë kthyer në normalitet, me siguri nuk do të doni të largoheni kurrë.
5.Provo sërish!
Mund t’ju sugjeronim një mori metodash të paligjshme për ta bërë këtë, por le të themi se nuk do të ishte etike nga ana jonë. Ndaj nëse vërtet mendon se, jeta jote nuk ka kuptim asgjëkund tjetër përveçse në Amerikë, atëherë mund të të duhet të presësh vitin tjetër për të aplikuar sërish në Lotarinë Amerikane dhe ndoshta universi do të dëgjojë thirrjen tënde.
