Plot 44 persona u helmuan ditën e shtunë dhe të diel në dy dasma në qytetin e Elbasanit. Pacientët kanë qenë në të njëjtin lokal në një dasëm, ndërsa mësohet se mes tyre është helmuar edhe dhëndri.
Luan Rrapi, nëndrejtor i spitalit rajon në Elbasan, ka thënë se në urgjencën e këtij spitali kanë shkuar 44 persona, mes tyre edhe fëmijë. 31 prej të helmuarve janë shtruar në spital.
“Ka disa të shtruar. Gatishmëria e spitalit është 100%. Deri tani ka 31 persona të shtuar, si edhe 2 fëmijë në pediatri. 3 persona i kemi dërguar në Tiranë dhe 8 raste kanë marrë mjekim ambulator. Që prej orës 1 nuk ka pasur më fluks pacientësh”.
Policia e Elbasanit është duke ndjekur që prej ditës së djeshme ngjarjen me helmimin në një dasëm. Ende nuk ka një shpjegim zyrtar për ngjarjen, ndërkohë që mësohet se janë marrë disa kampione nga ushqimi që ndodhej në lokal për të mësuar çfarë e ka shkaktuar helmimin e pacientëve.
