Një shqiptare 41-vjeçare është bërë nënë për herë të 16-të.
Bahrie Gashi ka 25 vite martesë dhe ajo ka pasur gjithsej 19 shtatëzani, por 3 fëmijë i ka dështuar.
“Kallxo.com” shkruan se nga nga 16 lindje vetëm katër i ka pasur në spital, ndërsa të tjerat i ka pasur të gjitha në shtëpi.
“Katër i kam lindur në spital, të tjerat në shtëpi më ndihmën e Zotit dhe të vjehrrës. Vjehrra më ka ndihmuar… Më mirë në spital se është kujdesi më i mirë dhe pritja më e mirë”, thotë ajo.
Gashi tregoi se planet e çiftit kanë qenë për 3 fëmijë por Zoti e deshi që ajo të bënte 16. Megjithatë ajo tregon se kushtet ekonomike nuk janë të mira pasi në familje punon vetëm bashkëshorti.
Pra e gjithë familja jeton me një pagë. Madje fëmijët e saj nuk e kanë pritur mirë lajmin që shtëpisë po i shtohet edhe një tjetër fëmijë, jo për shkak të numrit të tyre të madh, por për shkak të kushteve të rënda ekonomike.
Së fundmi, 41-vjeçarja është bërë edhe gjyshe dhe ky është një emocion shumë i madh për të.
Bahria tregon se fëmija i lindur pak ditë më parë është i fundit, pasi që ajo thotë se do ta shtojë kujdesin që të mos mbesë më shtatzënë.
