Një 40-vjeçar, banues në Levan të Fierit, është arrestuar nga policia pasi akuzohet se është autori i rrëmbimit të një vajze 17-vjeçare. Denoncimi i zhdukjes së saj është bërë nga familjarët e saj që në 7 dhjetor të vitit të kaluar.
40-vjeçari i arrestuar quhet Shpëtim Muharremi dhe dyshohet se është autori i rrëmbimit të 17-vjeçares.
“Ndalimi u bë pasi, nga denoncimi i prindërve të një shtetaseje 17-vjeçare banuese në Gjirokastër më datë 07.12.2017, si dhe veprimeve hetimore të deritanishme, dyshohet se është autori i rrëmbimit të 17-vjeçares dhe që e mban peng për motive të dobëta”, sqaron policia.
Mirëpo pavarësisht se 40-vjeçari është arrestuar ende e mitura nuk është gjetur dhe po vijojnë hetimet për lokalizimin e saj.
“Vazhdojnë hetimet për lokalizimin dhe gjetjen e të miturës si dhe zbardhjen e plotë të ngjarjes. Materialet në ngarkim të këtij shtetasi do t’i kalojnë Prokurorisë pranë Gjykatës së Shkallës së Parë në Gjirokastër për veprime të mëtejshme”, thanë burimet policore për gazetën “Panorama”.
