Dy persona kanë rënë në pranga si përgjegjës për vdekjen e 4-vjeçarit ditën e premte, të cilin e zuri korenti teksa po luante në një nga parqet e qytetit të Beratit.
Drejtori i shërbimeve në bashkinë e Beratit dhe përgjegjësi i ndriçimit në zonat urbane janë arrestuar, ndërsa 4 elektricistë janë proceduar në gjendje të lirë për ngjarjen e rëndë.
Të arrestuarit janë Poli Ikonomi 32 vjeç me detyrë drejtor i shërbimeve në bashkinë e Beratit dhe Llazar Oxholli 61 vjeç me detyrë përgjegjës i ndriçimit në zonat urbane, të dy banues në Berat. Në gjendje të lirë po ndiqen 4 elektricistët me inicialet F. T., H. I., E. B. dhe M. K.
Vogëlushi Aleksandër Brahimasi ishte në park duke lypur me nënën, por në një moment iu shkëput për të luajtur në park, ku ra në kontakt me rrymën elektrike, pasi kabllot ishin pa izoluar.
Pas tragjedisë në Berat, nëna e tij ka rrëfyer se gjithçka ndodhi pasi të voglit të saj i pihej ujë. Ajo ka deklaruar se vogëlushi donte të merrte ujë dhe ka rënë në kontakt me disa kabllo.
“Më tha një 10 vjeçar, shok i tij që luanin bashkë. Unë e çova në spital me një vajzë, kishte një Benz të parkuar. E kapi korenti se vajti për të marrë ujë”, tha nëna e dëshpëruar, Reshide Brahimasi për Fax News.
