Katër persona të cilët dyshohet se kanë lidhje me grabitjen e ndodhur në datën 9 prill në aeroportin e Rinasit janë vënë sot në pranga nga policia. “Report Tv” raporton se tre prej tyre janë bashkëpunëtorë ndërsa njëri prej të arrestuarve dyshohet se ka marrë pjesë në grabitje.
Një sërë kontrollesh janë ushtruar sot në qytetet e Tiranës, Elbasanit dhe Fushë-Krujës për zbardhjen e kësaj grabitjeje.
Nuk dihet ende identiteti i personave të arrestuar, ndërkohë që pritet që ditën e nesërme Policia dhe Prokuroria të dalin në një konferencë për të dhënë detaje nga hetimet e deritanishme në lidhje me këtë ngjarje.
Më herët gjatë ditës u zbulua servisi ku autorët e grabitjes kanë bërë modifikimin e furgonit ‘Hetimi Tatimor’ i cili u përdor për realizmin e grabitjes së 5.7 milionë eurove.
Burime për “Report tv” bëjnë me dije se servisi kishte më shumë se 6 muaj që i ishte dhënë me qera pikërisht Klement Calës, i cili ka nëshkruar kontratën përmes të afërmit të tij. Klement Cala është person i kërkuar dhe dyshohet se është një prej personave të shpallur në kërkim në lidhje me grabitjen e ndodhur në aeroportin e Rinasit.
