Mëngjesin e kësaj të enjte, 24 shtator 2020, ka rënë në prangat e policisë pedagogu i universitetit “Fan Noli” Korçë, Alket Dino.
Mësohet se Dino, u merrte studentëve 300 euro për një provim dhe sekser i tij ishte Xhevi Dervishi, gjithashtu i arrestuar.
Ai jepte mësim në fakultetin e Shkencave Sociale. Referuar raportimeve të para, bëhet me dije se pedagogu në fjalë, ushtronte presion te studentët dhe përdorte sekserin e tij, Xhevi Dervishi për t’u marrë para, në këmbim të notës.
Kujtojmë që ky nuk është rasti i parë, kur pedagogët kërkojnë para, apo favore të tjera ndaj studentëve, në këmbim të notës.
Rasti i fundit i raportuar në media, ishte shkarkimi i gjashtë pedagogëve në Universitetin Bujqësor, Tiranë, pas protestave studentore.
Njoftimi i policisë:
Specialistët për Hetimin kundër Korrupsionit në Drejtorinë Vendore të Policisë Korçë, nën drejtimin e SPAK, bënë arrestimin në flagrancë të shtetasve: A. D., 34 vjeç, banues në Korçë (me detyrë pedagog pranë Fakultetit të Shkencave të Natyrës dhe atyre Humane) dhe Xh. D., 35 vjeç (sekser) të dy banues në Korçë. Shtetasit e mësipërm, janë kapur në afërsi të këtij Fakulteti me një sasi prej 300 eurosh dhe 50.000 lekë, të cilat nga hetimet e kryera dyshohet se i kanë përfituar në mënyrë të kundërligjshme nga studentët, të cilat u sekuestruan në cilësinë e provës materiale. Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë për veprat penale “Korrupsioni pasiv i personave që ushtrojnë funksione publike”, “Korrupsioni aktiv” dhe “Ushtrimi i ndikimit të paligjshëm”.
