Producentët e “Fast and Furious” janë përpjekur që mungesën e Paul Walker ta zëvendësojnë me emra të tjerë të njohur, duke vënë krah Vin Diesel, Dwayne Johnson e Jason Statham në një përballje të paharrueshme.
Prania e Charlize Theron është një tjetër risi e filmit të ri “The Fate of the Furious”. Aktorja, në film shfaqet si një grua manipuluese, e cila përpiqet të joshë Domin në botën e krimit. Njerëzit e afërt të tij, përfshi edhe Lettyn, do të kuptojnë që ai nuk është më i njëjti.
Ajo që e bën më të veçantë për publikun shqiptar këtë film është fakti se, kastit të zgjedhur të aktorëve hollivudianë i bashkohen 3 emra shqiptarë. Erigerta Deda nuk është e panjohur për publikun e huaj, pasi imazhi i saj është familjar në prezantimin e produkteve të shumta në rolin e modeles. Në “Fast and Furious 8” ajo vjen në rolin e një kalimtareje.
Erand Hoxha është një tjetër aktor shqiptar, që në këtë film do të interpretojë rolin e një turisti.
Dhe, si në shumë raste të tjera kur vjen fjala te filmat amerikanë, sërish aktori nga Shkodra, Marko Caka vesh rrobat e policit në këtë film.
