Në një kohë që bizneset familjare janë më të prekurit nga kriza ekonomike e pandemisë dhe raportohet se po mbyllen 3 deri në 5 biznese të tilla në ditë (lexo këtu), qeveria vijon të godasë këtë sektor me aksionin e saj duke vendosur gjoba selektive nga njëra anë e duke mbyllur sytë ndaj peshqve të mëdhenj në bregdet.
Aksioni i gjobave është shtrirë nga Tirana në Durrës, ndërsa sa i përket jugut, autoritetet duket sikur bizneseve atje u kanë lënë dorë të lirë.
Së fundi, Policia e Tiranës ka ndëshkuar me nga 3.000.000 lekë gjobë, pronarët e dy restoranteve, pasi u konstatuan duke organizuar ceremoni martesore në kundërshtim me Aktin Normativ, duke mos respektuar protokollet e sigurisë.
Për subjektet në fjalë shërbimet e Policisë u kanë vendosur administratorëve S.GJ dhe I.S., masë administrative prej 3.000.000 lekë secilit.
Por ndërkohë që policia apelon për të gjithë pronarët/administratorët e subjekteve që ushtrojnë aktivitet, të respektojnë me rigorozitet protokollet e sigurisë dhe masat kufizuese, me qëllim parandalimin e përhapjes së COVID-19, e njëjtja polici po mbyll sytë ndaj shkeljeve që bëjnë të mëdhenjtë.
Në media qarkullojnë foto e video të ndryshme që dëshmojnë se resortet prestigjioze vijojnë të grumbullojnë njerëz dhe të mbajnë muzikën ndezur edhe pas orës 20:00 duke shkuar në kundërshti totale me ligjin, dhe pa u ndëshkuar.
Jo më larg se pak orë më parë, në adresë të iconstyle.al erdhi një video nga Dhërmiu që tregonte sesa shumë po respektohej Akti Normativ. Club-et më prestigjioze vijojnë aktivitetin e tyre si më parë pa u shqetësuar për asgjë.
Në videon mësipër, njerëzit shihen pranë njëri-tjetrit, pa respektuar distancën duke dëgjuar muzikë pas orës 20:00, ndërkohë që policia po vijon të merret me bizneset e vogla, të cilat po mundohen të ngrejnë sadopak kokën pas pandemisë, duke qenë se janë lënë në harresë nga qeveria.
Mbetet e pashpjegueshme sesi po kryhen këto ndërhyrje për gjobitjen e disa bizneseve dhe lënien e lirë të disa të tjerëve. Aq më tepër që gjobat selektive po bëhen publike në media si të ishin veprime heroike, vetëm për të treguar se aksioni vijon.
Por a nuk është ligji i barabartë për të gjithë, apo jemi të ndarë, ca të nënës e ca të njerkës?!
