Muzeu i Luvrit në Paris është rihapur të mërkurën, tre ditë pasi ndodhi një vjedhje spektakolare në Galerinë Apollo, ku u grabitën bizhuteri me vlerë rreth 88 milionë euro, njoftoi Prokurorja Publike e Parisit, Laure Beccuau.
Sipas hetimeve, grabitja zgjati më pak se shtatë minuta dhe u realizua nga katër persona, të cilët përdorën një ashensor mallrash të vjedhur për të hyrë në galeri përmes një dritareje. Ky ashensor ishte rrëmbyer në qytetin Louvres (Val-d’Oise) në një mashtrim ku autorët ishin paraqitur si blerës të interesuar për një reklamë online.
Gjatë largimit të tyre të shpejtë, hajdutët lanë pas disa sende që tani po analizohen nga ekspertët forenzikë, përfshirë një helmetë motori, një pishtar, radio komunikimi, jelek të verdhë, batanije dhe një bidon me benzinë.
Ndërsa muzeu kishte planifikuar një hapje të pjesshme që të hënën, ai qëndroi i mbyllur deri të mërkurën. Luvri ka njoftuar se disa pjesë të muzeut mbeten të mbyllura për publikun, pa dhënë detaje se cilat.
Presidentja e muzeut, Laurence des Cars, pritet të dëshmojë para Komitetit të Kulturës në Senat për të sqaruar rrethanat e ngjarjes dhe për të paraqitur masat e reja të sigurisë.
Ministria e Kulturës bëri të ditur se u vodhën tetë objekte me vlerë të jashtëzakonshme historike, ndërsa kurora e Perandoreshës Eugenie u braktis e dëmtuar gjatë arratisë. Deri tani, nuk është arrestuar asnjë i dyshuar.
