Ish-efektivi që u ekzekutua mbrëmjen e djeshme në Tiranë, Santiago Malko, la pas 2 fëmijët dhe bashkëshorten me të cilën u dashurua në Akademinë e Policisë.
I riu ishte i martuar me ish-efektiven e Policisë Dea Riçku, me origjinë nga Dibra dhe së bashku kishin dy fëmijë, një vajzë 3 vjece dhe djalin 14 muajsh, të cilët tani do të rriten pa baba.
“Panorama” raporton se Malko kishte përfunduar kursin për Patrullë të Përgjithshme dhe ka qenë pjesë e kësaj strukture në Policinë e Tiranës vetëm për 3 muaj, më pas është tërhequr vetë nga Policia.
Ndërsa bashkëshortja e tij ka qenë pjesë e Policisë së Tiranës, në njësinë “Shqiponja”, por edhe kjo është tërhequr nga Policia pas problemeve që pati në vitin 2016 Santiago.
Në atë kohë ai u përlesh fizikisht me 2 vëllezër, vetëm disa metra larg Drejtorisë së Policisë së Tiranës, për shkak të një borxhi të pakthyer.
Pasi u larguan nga policia, ata nisën një biznes privat, me veshmbathje, ku punonte Dea dhe motra e Santiagos.
Flasin familjarët
Në një prononcim për gazetën Panorama, familjarët e Deas, tregojnë se Santiago i kishte lënë pas historitë e vjetra dhe i ishte futur rrugës së fesë, duke u bërë një besimtar mysliman i devotshëm dhe familjar i devotshëm për dy fëmijët e tij.
