Një ditë më parë Henri Haxhiraj ishte i panjohur për publikun shqiptar, derisa shkrimi i “Deutsche Welle” kushtuar 26-vjeçarit mbushi titujt e mediave online.
Historia e këtij të riu dëshmoi sesa i trishtë mund të kthehet shpesh arsimimi në vendin tonë. Henri ishte një student me aspirata të mëdha, pavarësisht se nuk ishte me nota të mira, madje ai e cilëson veten si ngelës për periudhën e studimeve në nivelin bachelor në Fakultetin Ekonomik.
Por jeta e tij ndryshoi kur iu drejtua Gjermanisë për të vijuar studimet me nota të shkëlqyera, ndërsa prej 2018-s punon si bashkëpunëtor shkencor në Parlamentin gjerman.
Ata që e njohin Henrin dinë dhe faktin që gjatë kohës që vazhdonte studimet nisi karrierën në fushën e modelingut.
“Iconstyle.al” publikon disa foto rreth viteve 2011-2014, në të cilat studenti shihet duke pozuar apo sfiluar për markat e njohura në Shqipëri. Ndërsa u mësua bashkëpunimi i tij me fotografin e njohur, Sonny K. Elson, ne kontaktuam këtë të fundit.
Fillimisht Sonny shprehu gëzimin, që një prej talenteve të zbuluara prej tij në modeling, tashmë mban një pozicion me shumë rëndësi jashtë kufijve.
Ishte vetë Henri që kërkoi të takohej me fotografin, me dëshirën për t’u përfshirë në botën e modelingut dhe ajo që e veçoi nga të tjerët ishte serioziteti në atë që bënte.
“Jam i kënaqur, Henri ia ka arritur sepse ka qenë i vendosur që në fillim. Edhe kur bënte pjesën e modelingut e dinte që ishte një hobi i tij. Ai e dinte se ku do të arrinte. Ishte serioz në punë që bënte”, shprehet Sonny.
Ai madje kujton një nga momentet kur Henri shqetësohej për mënyrën sesi sfilonte:
“Unë i thosha ‘Mos e vrit mendjen për 15 metra, po për atë që do bësh për të ecur në jetë’. Dhe e demonstroi që ishte i saktë për pasarelën e përballimit të jetës”.
Ndërsa na mundëson publikimin e disa fotove të rralla, fotografi na tregon një tjetër talent të 26-vjeçarit, atë për të luajtur në piano.
Henri Haxhiraj, në vitet 2016-2018 kreu studimet master në degën Sustainable & Environmental Management pranë Universitetit të Eberswalde-s në Gjermani. Në vitin 2017 kreu një praktikë në Bundestag ku pati rastin të bënte edhe një fotografi me kancelaren gjermane, Angela Merkel.
