Me rastin e finales së “Conference League” qeveria ka vendosur që data 25 maj të jetë ditë pushimi zyrtar për administratën publike.
Ky ka qenë vendimi që mori sot Këshilli i Ministrave, ndërsa ishte ministri i Brendshëm, Bledi Çuçi që bëri njoftimin. Sipas këtij të fundit, pushimi do të bëhet në kuadër të masave për këtë event të madh sportiv për vendin tonë.
“Data 25 të shpallet ditë pushimi për të gjitha institucionet publike që janë pjesë e qarkut të Tiranës, do të jetë pushim për këtë qark. Kjo masë merret si masë për një ngjarje siç është finalja e konferencës së Ligës, ku presim një fluks të njerëzve që vijnë”, u shpreh Çuçi.
Vlen të theksojmë se më datë 25 maj do të mbahet ndeshja Roma-Face Feyenoord në stadiumin “Air Albania”, Tiranë.
Në kuadër të mbarëvajtjes dhe ruajtjes së qetësisë për finalen e Conference League, policia e shtetit po merr masa.
Zv.drejtori i Përgjithshëm i Policisë së Shtetit, Albert Dervishaj u shpreh për mediat tha se janë marrë të gjitha masat për ndeshjen dhe për aktivitetet qe do të zhvillohen.
Lëvizja e sportdashësve të ekipit të futbollit të Feyenoord drejt stadiumit do të bëhet e grupuar në këmbë nga “Fan Zona” tek pedonalja “Toptani”, përgjatë bulevardit “Deshmorët e Kombit”, në rrugën “Gjergj Filipi”, ndërsa ajo e sportdashësve të ekipit të futbollit të Romës drejt stadiumit do të bëhet e grupuar në këmbë nga “Fan Zona” tek Amfiteatri në kodrat e Liqenit Artificial, sheshi “Chopin”, rruga “Lek Dukagjini”.
Masat e planifikuara nga Policia e Shtetit, për këtë aktivitet të rëndësishëm, konsistojnë në disa plane:
– Eskortimin e ekipeve të futbollit të Romës dhe Feyenoord nga aeroporti i Rinasit në hotel, në stadium dhe në kthim për në Rinas;
– Eskortimi i Personaliteteve të Larta të UEFA dhe Personaliteteve të tjera Shtetërore nga aeroporti i Rinasit në hotel dhe në kthim për në Rinas;
– Eskortimi i automjeteve me sportdashës të të dy ekipeve të futbollit nga Rinasi dhe Durrësi në Tiranë dhe në kthim;
– Garantimin e rendit publik në dy “Fan Zonat” ku do të qëndrojnë një pjesë e mirë e sportdashësve të të dy ekipeve, gjatë lëvizjes së tyre nga “Fan Zona” në stadium dhe largimin në përfundim të ndeshjes;
– Organizimin e pikave të kontrollit të sportdashësve para hyrjes në stadium, në rrugën “Dervish Hima”, “Lek Dukagjini”, “Gjergj Filipi”, “Papa Gjon Pali II” dhe tek kolonat në sheshin “Italia”;
– Mbështetjen e stjuartëve gjatë kontrollit të sportdashësve para hyrjes në stadium;
– Organizimin e shërbimeve për garantimin e rendit publik para, gjatë dhe pas përfundimit të ndeshjes së futbollit jo vetëm pranë stadiumit, por edhe kontrollin e territorit në të gjithë qytetin e Tiranës;
– Sigurimin e rrugëkalimeve të shërbimeve të emergjencës;
– Menaxhimin e trafikut rrugor në qytetin e Tiranës, para, gjatë dhe pas ndeshjes së futbollit
