Sot shënohet Dita Botërore e Hemofilisë, e cila është një çrregullim gjenetik kryesisht i trashëguar që dëmton aftësinë e trupit për të kontrolluar mpiksjen e gjakut, një proces i nevojshëm për të ndaluar gjakderdhjen.
Kjo është një ditë ndërgjegjësimi mbi Hemofilinë dhe sëmundjet hemorragjike të trashëgueshme të gjakut.
Dita Botërore e Hemofilisë filloi në vitin 1989 dhe përkujtohet çdo vit më 17 prill në nder të datëlindjes së Frank Schnabel, themeluesit të Federatës Botërore të Hemofilisë në vitin 1963.
Hemofilia shkaktohet në 80% të rasteve nga deficiti i faktorit të VIII koagulues, që quhet Hemofilia A, por ekziston dhe Hemofilia B nga deficiti i faktorit të IX koagulues, apo deficiti i faktorit te XI dhe Hemofilia vaskulare.
Shenjat e para te sëmundjes mund të vihen re qe në ekzaminimet e para që i bëhen të porsalindurve, ku vihen re hematoma të nënlëkurës apo hemorragji pas një gërvishtjeje të vogël që zgjat për disa orë.
Në mosha më të rritura, njerëzit paraqesin hemorragji pas çdo dëmtimi fizik të hundës, dhëmbëve, kyçeve, lëkurës apo dhe prani të gjakut në urinë, të vjella dhe jashtëqitje.
