Policia franceze arrestoi sot të paktën 16 vetë, lidhur me grabitjen e armatosur të Kim Kardashian West në Paris, gjatë muajit tetor të vitit të kaluar.
Autoritetet thanë në kohën kur ndodhi grabitja se, ylli amerikan i “reality show”-t ishte grabitur me armë zjarri nga të paktën dy persona të veshur si policë.
Personat kishin hyrë në apartamentin luksoz të Kim Kardashian, e kishin lidhur atë dhe e kishin mbyllur në tualet. Ata ishin larguar me bizhuteri me vlerë rreth 10 milionë euro. Policia franceze tha se gjurmët e ADN-së, të lëna në ngjitësen që përdorën për t’i mbyllur gojën Kim-it, çuan në arrestimet e tyre.
Personat janë arrestuar në disa operacione të kryera herët në mëngjes në rajonin e Parisit. 36-vjeçarja, nënë e dy fëmijëve, e martuar me reperin Kanye West, tha se ajo kishte pasur frikë se do të vritej nga grabitësit.
Kardashian West ndodhej në kryeqytetin francez për Javën e Modës në Paris, bashkë me të ëmën, Kris Jenner dhe motrën e saj, Kendall Jenner. Kanye West ishte në skenë në një spektakël në Nju Jork në kohën e grabitjes, e pasi mori lajmin u tha fansave: “Më vjen keq, emergjencë familjare. Duhet të largohem!”.
Grabitja shkaktoi një stuhi të vërtetë në mediat sociale, me një numër personash të famshëm që jepnin mesazhe mbështetjeje.
Burimi: Daily Mail
