Kur dashuria triumfon, ajo është e vërtetë!
E tillë është edhe dashuria që Meti dhe Filxhonia ndjejnë për njëri-tjetrin. Ata ishin njohur përmes të afërmve të tyre dhe gjithçka ishte si në përralla deri në momentin që Filxhonia u diagnostikua me një sëmundje të pashërueshme.
Kjo e fundit fatkeqësisht ndodhi përpara 13 viteve, dhe që prej asaj dite e deri më sot bashkëshorti së bashku me djalin, kanë qëndruar pranë saj.
Meti i është drejtuar programit “Dua të të bëj të lumtur” për t’i shprehur dashurinë për të disatën herë bashkëshortes së tij dhe për t’i premtuar publikisht se s’do ta braktisë kurrë: “Atë që kam bërë për ty do të vazhdoj ta bëj gjithmonë deri në fund të jetës. Mua do të më kesh pranë gjithmonë! Ti je ajo që më frymëzon dhe më jep jetë çdo ditë.”
Këngëtarja e preferuar e Filxhonias ishte Xhensila Myrtezaj e cila me prezencën e saj në emision e lumturoi tej mase atë.
Myrtezaj u emocionua shumë nga historia në fjalë, ndërkohë u shpreh: “Besoj që jam e emocionuar pafund dhe nuk ndodh shpesh që të më mungojnë fjalët. Jam frymëzuar shumë nga historia juaj e dashurisë. Mua sot më keni mësuar një gjë shumë të madhe, që dashuria është forca më e madhe që ka njeriu. Kur ke njeriun e duhur në krah, nuk të duhet asgjë tjetër.” /top-channel
