13 shoqëri “call-center” do të rikthehen në Itali, pas nënshkrimit të një marrëveshje të kryeministrit italian, Paolo Gentilono. Këto kompani kryenin aktivitetin në vende si, Shqipëria, Bullgaria, Kroacia e Tunizia.
13 shoqëritë që kanë firmosur protokollin e marrëveshjes janë: Tim, Vodafone, Wind Tre, Enel, Eni, Poste, Sky, Mediaset, Unicredit, Intesa San Paolo, FastWeb, Ntv, e Trenitalia, të cilat përbëjnë rreth 65 % të të ardhurave të këtij sektori.
“Ky është një hap historik, një vlerë e shtuar për qeverinë italiane e që shpreh ndjeshmërinë e saj ndaj problemeve të shoqërisë duke u impenjuar të mbroj të drejtën e punës”, është shprehur kryeministri Gentiloni
Shoqëritë që kanë firmosur këtë protokoll impenjohen që, 95% e aktivitetit të drejtpërdrejt të tyre të zhvillohet në Itali.
“Sistemi i punës në shoqëritë “call-center” është një sektor kompleks, e ky protokoll është hapi i parë në politikat e ndërmarra nga qeveria për rregullimin e tij. Këto shoqëri nuk janë një sektor kalimtar i punës, por një sektor që sot punëson rreth 80 mijë persona”, tha ministri italian i zhvillimit ekonomik, Carlo Calenda.
Kjo marrëveshje pritet të ndikojë menjëherë te ekonomia shqiptare dhe veçanërisht te të rinjtë, shumica prej të cilëve e shohin si mundësinë e vetme të punësimit.
