Pas një jave propozimesh mes anëtarëve të Kongresit dhe administratës së presidentit Trump, për t’i ndihmuar shtetasit amerikanë të përballojnë krizën e koronavirusit, Senati duket se ka arritur një marrëveshje.
Ata ranë dakord të mërkurën për një paketë stimuluese gati 2 trilionë dollarë për të luftuar pasojat ekonomike të shpërthimit të koronavirusit, që përfshin pagesa direkte për shumicën e amerikanëve dhe një fond gjysmë trilioni dollarësh për të mbështetur kompanitë në vështirësi.
Projekt-ligji i ri përfshin dhënien e parave të gatshme deri në 1200 dollarë për të rriturit dhe për fëmijët 500 dollarë.
Paketa prej 2 trilionë dollarësh do të përfshijë edhe kredi për bizneset dhe një zgjerim të sigurimit të papunësisë dhe aspekte të tjera të rrjetit të sigurimeve shoqërore. Ajo vjen në një kohë kur miliona amerikanëve u është kërkuar të qëndrojnë larg shkollës dhe punës, dhe të qëndrojnë brenda shtëpive të tyre për të zvogëluar përhapjen e sëmundjes.
Shuma e pagesave të njëhershme, për të cilën zyrtarët shpresojnë se mund t’ua dorëzojnë amerikanëve menjëherë në fillim të muajit prill, do të bazohet në të ardhurat e raportuara në taksat e vitit 2018. Individët që kanë 99,000 dollarë të ardhura të deklaruara ose më shumë ose çifte të martuara që kanë 198,000 dollarë të ardhura ose më shumë nuk do të marrin asnjë çek. Njerëzit gjithashtu do të marrin 500 dollarë shtesë për fëmijët.
Ndërkohë, në Shqipëri është propozuar gjithashtu plani i qeverisë për t’u ardhur në ndihmë disa kategorive me nevoja më të mëdha në vend pas krizës së koronavorusit.
Katëgoritë janë bizneset e vogla që janë mbyllur për shkak të masave kufizuese, personat me ndihmë ekonomike dhe të papunët që marrin pagesë papunësie.
“Shuma për ata që kanë mbyllur biznesin do bëhet 57 miliardë lekë të rinj, dyfish i shumës së deklaruar si pagesa në kohë paqe (710 mln lekë). Këta janë plot 60 440 persona që s’do t’i lëmë vetëm“, u shpreh kreu i qeverisë.
Po kështu shuma që shteti në “kohë paqeje” paguan për familjet në kategorinë e ndihmës ekonomike (340 milionë lekë të reja në muaj), do të dyfishohet për 70 mijë familjet në nevojë të regjistruara.
“Ndaj që të jemi në rregull do shpërndajmë për familjet në ndihmë ekonomike, dyfishin e shumës që shpërndajmë në kohë paqe, pra ndihma ekonomike gjatë luftës për 70 mijë familje që janë në regjistër e ndihmës shtetërore do dyfishohet”.
Rama tha gjithashtu se do të dyfishohet pagesa për të papunët, por nuk foli me shifra konkrete për këtë kategori duke e lënë disi të paqartë:
“Kemi në regjistrin e ndihmës shtetërore edhe të papunët që marrin pagesë papunësie. Dyfish do e bëjme edhe pagesën e papunësisë se nuk është koha për të parë si llogaritar strikt ligjin por për të zbatuar edhe zakonin si shqiptar“.
/Iconstyle.al
