Është rritur me 12 numri i të infektuarve me koronavirus në vendin tonë, duke e çuar totalin e të prekurve në 868.
Ministria e Shëndetësisë bëri me dije se, nga rastet e reja, 8 janë paraqitur në Tiranë, 2 në Kamzë, një në Krujë dhe një në Fier.
Vetëm gjatë 24 orëve të fundit janë testuar 170 qytetarë, ndërsa të shtruar në dy spitalet COVID janë 29 pacientë.
Me pak se 15% e te prekurve aktivë po marrin trajtim në spitalet Covid, pjesa tjetër ndiqet nga mjeku i familjes. Nga 29 të shtruar, vetëm 4 prej tyre janë në terapi intensive, dhe prej më shumë se 10 ditësh nuk kemi asnjë humbje jete.
“Gjatë ditëve të fundit kemi një përmirësim të situatës edhe në spitale. Aktualisht në dy spitalet COVID, në spitalin infektiv dhe spitalin “Shefqet Ndroqi”, janë të shtruar 29 pacientë dhe vetëm 4 prej tyre janë në terapi intensive, dhe prej më shumë se 10 ditësh nuk kemi asnjë humbje jete”.
Nga dita e hënë, 11 Maj shtohen si zona të gjelbërta bashkitë: Lushnje, Patos, Roskovec, Korcë, Has, Kukës, Lezhë, Mirditë, Fushë-Arrez, Malësi e Madhe, Pukë, Vau Dejes, Kavajë dhe Vorë, me të njëjtat rregulla.
Në këto zona lejohet qarkullimi ndërqytetas brenda zonave të gjelbërta me automjet privat, duke lejuar udhëtimin e më shumë se dy personave të së njejtës familje, deri në orën 21:00.
Situata në mbarë botën:
Në nivel global, më shumë se 279,000 persona kanë vdekur nga COVID-19, ndërsa numri i infeksioneve të konfirmuara ka tejkaluar shifrën 4 milionë. Më shumë se 1.3 milionë njerëz janë rikuperuar.
Kina dhe Koreja e Jugut raportojnë infeksione të reja në rastet e koronavirusit, me Seul-in që regjistron 34 raste të reja – rritja më e madhe në rreth një muaj.
Barack Obama sulmoi ashpër trajtimin e pandemisë së koronavirusit nga ana e Presidentit amerikan Donald Trump, duke e quajtur atë një “katastrofë kaotike absolute”.
Franca regjistron numrin e saj më të ulët në një muaj, me 80 vdekje të raportuara të shtunën, pasi autoritetet po përgatiten të lehtësojnë kufizimet e lëvizjes publike.
Kryeministri italian Giuseppe Conte është shprehur se këtë evrë italianët do të bëjnë pushime.
“Këtë verë nuk do të qëndrojmë në ballkon dhe bukuria e Italisë nuk do të jetë në karantinë. Po, mund të shkojmë në det, në mal, mund të shijojmë qytet tona edhe pse këtë vit do të jetë ndryshe me rregulla dhe me shumë kujdes”.
Ndërkohë, numri i vdekjeve nga shpërthimi i koronavirusit në Brazil u rrit në 10.627, me 730 viktima të regjistruara në 24 orët e fundit, njoftuan zyrtarët shëndetësorë të vendit.
/Iconstyle.al
