Gazetari Sokol Balla mund të jetë ndër personazhet më të njohur të ekranit, por jo të gjithë e dinim që ai kishte një vëlla më të vogël. Ai është treguar i rezervuar sa i përket jetës private, por me sa duket çdo gjë ka kohën e vet.
Ai quhet Rezar Balla, është 10 vjet më i vogël dhe ne për herë të parë e njohëm nga një videomesazh gjatë intervistës së Ballës në emisionin “Një kat më lart”.
Rezari foli për kujdesjen që ka marrë gjatë gjithë kohës nga vëllai i madh, ndërsa nuk ngurroi të tregojë edhe një foto të vjetër nga fëmijëria me Sokolin.
“Është e pamundur realisht që në 60 sekonda të tregosh dhe shpjegosh faktin që dikush të të mbajë në krahë në këtë foto kur unë ende nuk ecja dhe sot ta kesh përsëri në krahë. Koli është nga ata vëllezër që të gjithë do ta donin ta kishin pasi ai të bën dhuratë për ditëlindjen e tij”, tha ai.
Gazetari Sokol Balla u emocionua nga kjo surprizë e bukur e vëllait të vogël. Rezari merret me PR dhe ashtu siç tha Sokoli, është nona e rrjeteve sociale.
