Ashtu siç premtoi dje kryeministri Edi Rama, qeveria ka vendosur t’i vijë në ndihmë familes së 10-vjeçarit, i cili u përplas për vdekje nga ambulanca në Kakavijë, ndërsa priste të kalonte kufirin.
Kreu i qeverisë ka bërë me dije sot vendimin për të asistuar me një shumë prej 500.000 lekësh të rinj, duke i shprehur dhe njëherë familjes ngushëllimet.
“Sot vendosëm që si qeveri të asistojmë familjen e të miturit që humbi tragjikisht jetën pasi i preu rrugën autoambulancës në Kakavi, me një shumë prej 500.000 lekësh të reja, duke i rishprehur dhe njëherë familjes ngushëllimet tona më të ndjera?Engjëlli i vogël u dhëntë forcë”, shkruan Rama.
10 vjeçari humbi jetën tragjikisht dy ditë më parë. Ngjarja ndodhi rreth orës 10:30, në aksin nacional Kakavije – Gjirokastër, në afërsi të kthesës së Bularatit, ku një autoambulancë me drejtues shtetasin A. G, thuhej se po transportonte një shtetase të sëmurë për në spitalin rajonal Gjirokastër.
Por dëshmitarë thonë se ambulanca ishte bosh dhe me mbi 100 km në orë në një zonë ku ishte e mbipopulluar nga njerëz që prisnin të kalonin doganën.
