Ky vit televiziv premton spektakël. Nga një dramë ligjore me yje të mëdhenj si Kim Kardashian, te një serial i ri fantastiko-shkencor nga krijuesi i Breaking Bad, Vince Gilligan, dhe rikthimi i shumëpritur i Stranger Things në sezonin e tij të fundit, platforma si Netflix, HBO dhe Apple TV+ po garojnë për të sjellë produksionet më të mëdha të sezonit.
Më poshtë, përmbledhja e 10 serialeve që duhet t’i keni në radar këtë vjeshtë-dimër:
1. I Love LA (HBO Max)
Një komedi e zgjuar për miqësi, dashuri dhe ambicie në Los Angeles.
Aktorja dhe skenaristja Rachel Sennott (e njohur nga Bottoms dhe Shiva Baby) sjell një histori të ngrohtë, plot humor sarkastik, për një grup miqsh që ribashkohen në qytetin e ëngjëjve. Ajo luan rolin e Maias, ndërsa Josh Hutcherson (The Hunger Games) është i dashuri i saj Dylan.
Një ribashkim që shndërrohet në dramë kur shfaqet shoqja e vjetër, Tallulah, duke nxitur tensione e situata qesharake.
Yje të ftuar: Leighton Meester dhe Elijah Wood.
2. All’s Fair (Ryan Murphy / Hulu)
Kim Kardashian kthehet në ekran me një rol që i përshtatet në mënyrë perfekte – një avokate divorcesh që braktis firmën mashkullore për të themeluar kompaninë e saj plot gra të fuqishme.
Producenti legjendar Ryan Murphy (i njohur për American Horror Story) sjell glamur, intrigë dhe emra të mëdhenj si Naomi Watts, Sarah Paulson, Glenn Close, Niecy Nash-Betts, Brooke Shields dhe Jennifer Jason Leigh.
Me personazhe me emra si Allura, Liberty, Emerald dhe Carrington, dhe me një estetikë luksoze që ka magjepsur publikun, traileri i serialit ka kapur tashmë 44 milionë shikime në YouTube.
3. All Her Fault (Netflix)
Pas suksesit në Succession, Sarah Snook luan rolin e një nëne të dëshpëruar, Marissa Irvine, që kërkon djalin e saj pesëvjeçar pas një zhdukje misterioze. Me një skenar plot tension dhe kthesa, seriali eksploron fajin, paranojën dhe sekretet e errëta të një rrethi shoqëror të privilegjuar. Në rol ndihmës shfaqen Jake Lacy, Dakota Fanning dhe Michael Peña.
4. Death by Lightning (Netflix)
Një dramë historike për presidentin amerikan James Garfield, i cili u vra vetëm gjashtë muaj pas marrjes së detyrës në vitin 1881. Michael Shannon luan Garfield-in, ndërsa Matthew Macfadyen (Succession) është atentatori i tij, një fanatik i çmendur që kërkon famë. Seriali, prodhim i David Benioff dhe D.B. Weiss (krijuesit e Game of Thrones), sjell politikë, fanatizëm dhe tragjedi në një epokë të harruar të Amerikës.
5. Pluribus (Apple TV+)
Krijuesi i Breaking Bad, Vince Gilligan, rikthehet me një histori fantastiko-shkencore që do të bëhet hit.
Një virus përhapet në botë, duke i bërë të gjithë njerëzit të qetë e të lumtur, përveç Carol (Rhea Seehorn, Better Call Saul), një shkrimtare që refuzon “paqen e rreme”. Një satirë e zgjuar mbi shoqërinë moderne, lumturinë dhe manipulimin, me tone filozofike dhe humor të errët. Gilligan ka lënë të kuptohet se seriali zhvillohet sërish në Albuquerque dhe përfshin “vezë Pashke” për fansat e tij besnikë.
6. The Beast in Me (HBO)
Një triller psikologjik ku Claire Danes dhe Matthew Rhys përballen me misterin dhe fajin. Aggie, një shkrimtare që sapo ka humbur djalin, miqësohet me një fqinj të errët, një burrë i dyshuar për zhdukjen e gruas së tij. Ndërsa ajo fillon të shkruajë librin për të, realiteti dhe obsesioni fillojnë të përplasen. Seriali eksploron kufijtë e moralit dhe çmendurisë, në stilin e Gone Girl.
7. Last Samurai Standing (Netflix)
Një përzierje epike midis Shōgun dhe Squid Game. Në Japoninë e vitit 1878, 292 samurai ftohen në një garë për mbijetesë, ku vetëm njëri do të dalë gjallë dhe i pasur. Një serial vizualisht madhështor, me 1000 anëtarë kasti dhe ekipi, i mbushur me duele, nder, sakrificë dhe gjak. Një sagë që do të tërheqë si adhuruesit e animeve ashtu edhe të dramave historike.
8. Malice (Prime Video)
Një thriller me tone misterioze dhe atmosferë britanike. Jack Whitehall, i njohur për rolet komike, hyn në territor të errët si një dado që futet me qëllim në jetën e një familjeje të pasur. Çfarë sekreti fsheh ai dhe pse ka zgjedhur pikërisht ata? Me David Duchovny dhe Carice van Houten, seriali shpalos ngadalë një histori hakmarrjeje të ftohtë e të menduar mirë.
9. The American Revolution (PBS)
Regjisori legjendar Ken Burns sjell një dokumentar 12-orësh për 250-vjetorin e Deklaratës së Pavarësisë së SHBA-së. Ky projekt monumental eksploron jo vetëm figurat e njohura si George Washington dhe Thomas Jefferson, por edhe rolin e grave, njerëzve me ngjyrë dhe komuniteteve indigjene. Me zëra nga Paul Giamatti dhe shumë historianë, seriali është një leksion i ri mbi mënyrën se si lindi demokracia moderne.
10. Stranger Things 5 (Netflix)
Pas më shumë se tre vitesh pritje, Stranger Things kthehet për sezonin e pestë dhe të fundit.
Historia zhvendoset në vitin 1987, ku Eleven (Millie Bobby Brown) dhe miqtë e saj përgatiten për betejën përfundimtare kundër Vecna-s.
Netflix ka ndarë sezonin në tri faza:
- Kapitujt e parë dalin në nëntor,
- tre të tjerë në Krishtlindje,
- dhe finalja e madhe në natën e Vitit të Ri.
