Miliarderët shtuan 5 trilion dollarë në pasurinë e tyre gjatë pandemisë, sipas “Oxfam”, duke përkeqësuar pabarazinë ekonomike pasi pandemia shtyu miliona njerëz në mbarë botën në varfëri.
Duke përdorur të dhënat e përpiluara nga Forbes, “Oxfam” thotë në një raport të ri se pasuria totale e miliarderëve u hodh nga 8.6 trilion dollarë në mars 2020 në 13.8 trilion dollarë në nëntor 2021, një rritje më e madhe se në 14 vitet e mëparshme së bashku.
10 burrat më të pasur në botë panë pasurinë e tyre kolektive të shtohet më shumë se dyfish, duke u rritur me 1.3 miliardë dollarë në ditë.
“Thuajse çdo ditë përgjatë pandemisë është krijuar një miliarder i ri, ndërsa 99% e popullsisë botërore ka qenë më keq për shkak të izolimeve apo reduktimit të tregtisë dhe turizmit ndërkombëtar. Si rezultat, 160 milionë njerëz të tjerë janë shtyrë drejt varfërisë dhe jetojnë me më pak se 5,5 dollarë në ditë”, tha Danny Sriskandarajah, shefi Oxfam në Britaninë e Madhe.
Raporti u publikua përpara agjendës në internet të Forumit Ekonomik Botëror të Davosit, e cila do të zhvillohet këtë javë pasi takimi vjetor personal i grupit u vonua për shkak të Omicron.
Sipas të dhënave të “Forbes”, të cituara nga Oxfam, 10 njerëzit më të pasur në botë janë Elon Musk, Jeff Bezos, Bernard Arnault, Bill Gates, Larry Ellison, Larry Page, Sergey Brin, Mark Zuckerberg, Steve Ballmer dhe Warren Buffet. Ndërsa pasuria e tyre kolektive u rrit nga 700 miliardë dollarë në 1,5 trilionë dollarë, ka një ndryshim të rëndësishëm mes tyre; me pasurinë e Musk që u rrit me më shumë se 1000%, ndërsa ajo e Gates me 30 për qind. Sipas raportit të Oxfam që bazohet tek të dhënat e Bankës Botërore, mungesa e qasjes te kujdesi shëndetësor, uria, dhuna me bazë gjinore dhe degradimi i klimës kontribuuan për 1 vdekje çdo 4 sekonda.
“Oxfam” argumenton se qeveritë duhet të tatojnë fitimet e bëra nga super të pasurit gjatë pandemisë dhe t’i përdorin paratë për të financuar sistemet e kujdesit shëndetësor, për të paguar vaksinat, për të luftuar diskriminimin dhe për të adresuar krizën klimatike.
