Një histori e veçantë dhe prekëse vjen nga materniteti “Mbretëresha Geraldinë” në Tiranë, ku 10 mami, që çdo ditë kujdesen për gratë shtatzëna dhe foshnjat e sapolindura, sot po përjetojnë vetë mrekullinë e jetës.
Në faqen zyrtare të këtij materniteti, u publikua një mesazh i mbushur me emocion, ku theksohet se këto profesioniste të shëndetit, të njohura për punën e tyre të palodhur, tashmë mbajnë brenda vetes bekimin më të madh, pritjen e një jete të re.
“Nga duart që kujdesen për jetën, tek zemrat që mbajnë jetë brenda tyre. Në maternitetin ‘Mbretëresha Geraldinë’, 10 mami po përjetojnë së bashku mrekullinë e shtatzënisë. Ato që çdo ditë kujdesen me përkushtim maksimal për gruan, nënën dhe foshnjën, sot mbajnë edhe vetë bekimin më të madh, jetën brenda tyre. Një dhuratë e rrallë që na emocionon të gjithëve!”,- thuhet në postim.
Ky rast i veçantë ka ngjallur gëzim dhe emocion jo vetëm te stafi mjekësor, por edhe te qytetarët që e ndoqën lajmin në rrjetet sociale. Shumë komentues e kanë cilësuar këtë si një “bekim të dyfishtë”, duke vënë në dukje se mami jo vetëm sjellin jetë çdo ditë, por edhe vetë janë bërë bartëse të këtij misioni të shenjtë.
Materniteti “Mbretëresha Geraldinë” është një nga institucionet kryesore të kujdesit për nënën dhe fëmijën në vend.
