1.Banjot e qelbura. Në shumë prej tyre mungon ende uji i rrjedhshëm. Nuk kanë investuar as për të blerë një tip depozite për ta vënë minimalisht në tavanin e banjës. Nëse ndodh që të ketë sapun, është aq i ndotur, sa nuk guxon ta prekësh. Nëse ndodh të ketë letër higjienike, është nga ajo më e lira në treg dhe e pluhurosur. Letër për të fshirë duart? Jo, po ja, ke atë tharësin elektrik, gjithashtu të qelbur e të papërdorur prej nuk e di sa kohësh.
2.Të rinj e të reja të pispillosure parfumosur që vijnë me makina të shtrenjta e që të shohin me përçmim nëse nuk t’i njohin markat e veshjeve apo këpucëve.
3.Fytyra që shprehin arrogancë, përbuzje dhe një lloj injorimi të konsideruar ‘legjitim’ mes njëri-tjetrit, duke filluar nga roja te dera që të mat me sy para se të vendosë të të lejojë të hysh apo jo, ndaj kujtdo që shpreh një lloj kritike ndaj punës së tyre.
4.Përgjigjet standard “Po kjo nuk është puna ime”, “Po nuk është këtu ai që merret me këtë punë”, “Kështu thotë ligji”, etj.
5.Takime që fillojnë e mbarojnë pa marrë asnjë lloj vendimi se çfarë duhet të bëhet më tej, kush do ta bëjë, për sa kohë, etj.
6.Gabimet e tmerrshme drejtshkrimore në shkresat e shkruara nga sekretaret e zellshme dhe të miratuara e firmosura nga këshilltarë buzëqumësht që krekosen me kollare e me një shikim prej eksperti “të padiskutueshëm” përtej syzeve me skelet të trashë.
7.Anonimiteti i plotë. Askush nga administrata nuk e merr mundimin tëtë prezantohet me emër. Asgjëkundi nuk shikon tabela ku të shpjegohet se cila është njëra zyrë e cila tjetra. Nëse ndodh të hysh në ndonjë nga ato institucionet me zyra shumë, bën vaki që rrugës për te zyra përkatëse, të humbasësh.
8.Faqe interneti gjysmake. Numra telefoni jofunksionalë apo përgjigje anonime sa për të kaluar radhën. Përgjigja në këto raste “ Po, ju kuptova. Do ta shqyrtojmë problemin tuaj. Na merrni prapë” (Përkthimi: ti je hallexhiu, n’daç merr, n’daç rri!).
9.Gra/burra politikanësh që kanë zënë myk në ca pozicione, pa e marrë vesh njeri e pa guxuar njeri të pyesë e të mësojë se për çfarë dreqin paguhen nga taksat tona.
10.Banjat e qelbura. E di që e thashë një herë që në fillim dhe e di që për ata vetë nuk përbën problem, se e mbysin kutërbimin me parfumet e tyre të shtrenjta, por kam hallin tim. Madje edhe unë vetë jam mësuar, s’më bën më përshtypje, por më vjen turp sa herë jam me ndonjë të huaj që e zë halli të shkojë në banjë ndërkohë që jemi aty.
Luna Ruvina/Dritare.net
