Askush nuk e di me siguri se sa ndikim ka në jetën e dikujt tjetër!
Një fjalë, një gjest, një shikim, një like në rrjetet sociale, sot, flet shumë!
Për këtë do të flasim sot përmes serialit të ri “13 Reasons Why” që kemi në rubrikën javore dhe që është bazuar në librin me të njëjtin titull të Jay Asher.
Që prej daljes në vitin 2017 në Netflix, “13 Reasons Why” ka nxitur mjaft polemika. Sezoni i parë flet për jetën e disa nxënësve të shkollës “Liberty High”, të cilët ndihen (ose janë) të gjithë përgjegjës për vetëvrasjen e shoqes së tyre të shkollës, Hannah Baker.
Seriali merr guximin për të trajtuar temën e shëndetit mendor të adoleshentëve, por gjithashtu është kritikuar ashpër për mënyrën sesi e trajton vetëvrasjen e adoleshentes. Shumë psikologë ngritën shqetësime se një skenë specifike që përshkruan se si u vetëvra Hana (e cila u hoq më vonë) mund të krijonte një shembull aspak pozitiv për ata adoleshentë që janë pjesë e bullizmit.
Si nis historia
Hannah Baker është një adoleshente normale me ulje-ngritjet e zakonshme të asaj moshe, derisa njëra gjë pason tjetrën dhe ajo zgjedh opsionin e vetëvrasjes.
Seriali nis duke u fokusuar te personazhi Clay Jensen (Dylan Minnette) një adoleshent i cili kthehet nga shkolla dhe gjen një kuti misterioze me emrin e tij sipër.
Brenda kutisë ai zbulon disa kaseta të regjistruara nga Hannah Baker (Katherine Langford), shoqja e tij e klasës dhe njëkohësisht vajza e tij e zemrës, që ka vetëm 2 javë që ka vdekur. Në kasetë, Hannah shpjegon 13 arsyet e saj përse vendosi t’i jepte fund jetës. Historinë e mësojmë duke na e rrëfyer vetë Hannah bashkë me përjetimet e Clay-t.
Skenaristët kanë arritur ta bëjnë interesante një temë kaq të errët dhe shqetësuese duke e shndërruar atë në një mister të dyshimtë. Çfarë do të ketë në kasetën tjetër? Kush janë studentët e përfshirë që e shtynë Hanna-n të vetëvritej? Ndërsa Clay dëgjon kasetat, ne duhet të udhëtojmë së bashku me të dhe të mësojmë njëkohësisht historinë me të gjitha detajet, ato të bukura dhe ato të trishta.
Bullizmi
Bullizmi trajtohet në mënyrën më origjinale të mundshme.
Në një moment gjatë serialit, prindërit e Hannah të shkatërruar nga vdekja e vajzës së tyre, padisin shkollën, duke pretenduar se vajza e tyre është tallur vazhdimisht dhe është ngacmuar nga bashkëmoshatarët.
Personi i parë që Hannah veçon se kontribuoi në vetëvrasjen e saj ishte Justin, i cili i bëri asaj një foto komprometuese dhe e shpërndau në celularin e të tjerëve, duke i dhënë asaj një reputacion si “një vajzë e lehtë”.
Të gjithë mund të fajësojnë Justin deri në momentin që shohin anën tjetër të medaljes. Adoleshenti abuzohet shpesh nga i dashuri pijanec i nënës së tij, dhe është po aq viktimë sa edhe shumë të tjerë në listën e atyre personave që fajëson Hannah për vetëvrasjen e saj.
A duhet ta shohin adoleshentët?
Kjo pyetje është bërë prej fillimit kur doli seriali dhe bëri bujë të madhe në mediat sociale. Shumë prindër u detyruan që ta shihnin vetë fillimisht, para se ta shihnin fëmijët e tyre.
Por një gjë është e sigurt, që prindërit që kanë fëmijë adoleshentë DUHET ta shohin. Seriali është një qasje e drejtpërdrejtë ndaj subjekteve të ndjeshme përfshi këtu përdhunimin, ngacmimin, bullizmin, që çojnë ne nevojën e një reagimi nga ana e administratorëve të shkollës apo profesionistëve të shëndetit mendor.
Bullizmi është krim e ndonëse duket si i parëndësishëm është ushqimi i përditshëm i vetëvrasjeve të të rinjve. Ky film është një thirrje për të ofruar e për të kërkuar ndihmë, pasi vetëvrasja nuk duhet konsideruar kurrë si një opsion.
