Ka kaluar fiks një muaj që nga hapja e bareve dhe restoranteve më 18 maj, pasi qëndruan me muaj të mbyllur nga pandemia dhe situata mbetet ende shumë e vështirë.
Përfaqësuesit e këtij sektori nuk janë aspak optimistë për muajt në vijim, dhe as pas asaj pak mbështetjeje që ju erdhi nga pushteti vendor me shtyrjen e taksave dhe heqjen e hapësirës publike deri në qershor.
Përmes një interviste për “Iconstyle.al”, kreu i Shoqatës së Bareve dhe Restoranteve, Enri Jahaj tha se kërkesat e sektorit vijojnë të jenë të qarta për reduktimin e TVSH-së apo mbështetjen financiare për ato bare dhe restorante që kanë qenë të mbyllura këto muaj:
“Reduktim i TVSH-së në masën e hotelerisë pra 6 %, është një ndër kërkesat, pasi kjo do i jepte një shtysë sektorit dhe nuk do kishim pse të rrisnim çmimet; shtyrjen e te gjitha llojeve te taksave deri ne mars 2021; Fillimin e dhënieve të kredive te buta për kapital qarkullues pasi deri tani nuk kane filluar ende dhe hartimin e një plani strategjik për rimëkëmbjen e sektorit”.
Një tjetër problem është respektimi i protokollit të masave të mbrojtjes nga COVID-19 që lë për të dëshiruar. Qytetarët nuk zbatojnë rregullat duke rrezikuar kështu jo vetëm njëri-tjetrin, por edhe gjobitjen e menaxherëve apo pronarëve të lokaleve.
“Klientët nuk e venë në zbatim protokollin dhe distancimin”, shprehet Jahaj duke nënkuptuar se ka pasur dhe vështirësi në këtë drejtim me rregullat e reja, që nuk po respektohen.
Por si parashikohen muajt e verës? Situata e vështirë ekonomike në vend pritet të ndikojë edhe në sektorin e bareve dhe restoranteve, për të mos folur për uljen e numrit të turistëve këtë vit, që përkthehet në rënie klientele.
“Muajt e verës parashikohen të vështirë pasi nuk pritet të ketë dhe turistë dhe me gjendjen e deritanishme klientët kanë filluar të kursejnë e të përgatiten për muajt më të vështirë që pritet të vijnë shtator, tetor ku mund të kemi rimbyllje përsëri”, shprehet Jahaj.
Me të gjitha gjasat, ky vit do të jetë një vit zero për sa u përket fitimeve për këtë sektor, ose ashtu siç është quajtur, viti i mbijetesës.
/Iconstyle.al
